Բրազիլիացի ռեժիսորի ֆիլմում հնարավոր է՝ տեղ գտնի նաեւ Հայոց Ցեղասպանությունը

Բրազիլիացի ռեժիսոր Ֆիլիպի Բարբոսան «Ոսկե Ծիրանին» ներկայացրել էր իր «Մեծ տունը» ֆիլմը, որը ներկայացնում է մեծ ընտանիքի, մեծ երկրի` Բրազիլիայի իրավիճակը և այնտեղի խնդիրները:

Ֆիլմում ներկայացված են հասարակության երկու շերտեր` հարուստներ և աղքատներ: Բարբոսայի հավաստմամբ, ֆիլմում գործողություններն իր կյանքից են: Երբ նա Նյու Յորքում մագիստրոս էր, հայրը սնանկացման եզրին էր եւ Ֆիլիպիին հետաքրքիր էր, թե ինչ կլիներ, եթե այդ ժամանակ ընտանիքի կողքին լիներ:

«Մեզ մոտ ռեժիսորները վերնախավից են սերում: Ես ամեն ինչ ունեմ, ոչնչի կարիք չունեմ և ինձ համար հետաքրքիր է իմ կողքին ապրող աղքատ խավը»,-լրագրողների հետ զրույցում ասաց բրազիլիացի ռեժիսորը:

Ֆիլիպի Բարբոսան չնայած քիչ գիտի Հայաստանի և հայերի մասին, բայց պարզվում է՝ հրաշալի գիտի Հայոց Ցեղասպանության մասին:

«Ցեղասպանության մասին վաղուց եմ իմացել: Այս իմաստով մեր ժողովուրդներն իրար նման են. ցեղասպանության գործոնը մեր երկրում ևս առկա է»,-ասաց նա:

Բարբոսան հայտարարեց նաեւ, որ պատրաստվում է ֆիլմ նկարահանել ցեղասպանություն տեսած երկրների մասին: «Հնարավոր է սցենարը փոփոխվի և ֆիլմի հերոսը թանգարանում այլ ցեղասպանությունների կողքին հայկական ցեղասպանությանը ևս ծանոթանա և այդ մասին նույնպես ներկայացնենք»,-ասաց նա: