Ցուցարարների պահանջներից մեկը բավարարվեց. Իվանիշվիլին հանդես է եկել հայտարարությամբ

Իշխող «Վրացական երազանք» կուսակցության հիմնադիր Բիձինա Իվանիշվիլին կուսակցության քաղխորհրդի նիստից հետո հանդես է եկել հայտարարությամբ. տեղեկացնում է aliq.ge կայքը:

Խոսելով այն մասին, որ ժողովրդավարության համար բազմակարծությունը մեծ նշանակություն ունի, Իվանիշվիլին հայտարարել է, որ 2020 թվականից ընտրությունները կանցկացվեն համամասնական ընտրակարգով:

Բիձինա Իվանիշվիլիի խոսքով` 2024 թվականից Սահմանադրությունում համամասնական ընտրությունների մասին փոփոխությունը եղել է հենց «Վրացական երազանքի» նախաձեռնությունը:

Հիշեցնենք` սա Թբիլիսիում արդեն մի քանի օր շարունակվող ցույցերի մասնակիցների պահանջներից էր:

Ցուցարարների հիմնական պահանջներն են`

1. համամասնականով ընտրություններ 2020 թվականից,

2. ազատ արձակել հունիսի 20-ի գիշերը ձերբակալվածներին,

3. ՆԳ նախարար Գիորգի Գախարիայի հրաժարականը,

4. պատասխանատվության ենթարկել հունիսի լույս 21-ի գիշերը ուժ կիրառած ոստիկաններին: