Վարչապետը պետք է կատարի իր խոստումը. Մելիքգյուղի բնակիչները կառավարության շենքի առջև բողոքի ակցիա են իրականացնում

Կառավարության շենքի մոտ են հավաքվել Արագածոտնի մարզի Մելիքգյուղ համայնքի բնակիչները: Նրանք պահանջում են վարչապետ Նիկոլ Փաշինյանից` կատարել իր` 1 տարի առաջ տված խոստումը: Գյուղի բնակիչները պնդում են, որ միջպետական  մայրուղուց դեպի գյուղ մտնող ճանապարհահատվածը աղետալի վիճակում է: Նրանց խոսքով` քանդված ու քայքայված ճանապարհի ահռելի փոսերով միայն անասուններն են կարողանում անցնել, մեքենաները գյուղ չեն մտնում, հետևաբար` գյուղի վիճակն անտանելի է դարձել:

Բնակիչներից մեկը նշում է. «Մարդը լավ չի զգում, զանգում ենք շտապօգնություն, 45–50 րոպե հետո նոր հասնում է գյուղ։ Հրշեջ ծառայություն որ զանգում ենք, էլի նույնն է։ Մեր գործը շատ վատ է, մեր բերքը մինչև հասցնում ենք շուկա, փչանում է»:

Բողոքի ակցիայի մասնակիցները շեշտում են նաև, որ, բացի ճանապարհի խնդրից, գյուղում նաև ջրի ու գազի  խնդիր կա,  չկա մանկապարտեզ, այլ միայն` մեկ դպրոց: