Գրավատների ու փոխանակման կետերի աշխատակիցները կրկին բողոքի ակցիա են իրականացնում կառավարության շենքի առջև

Հայաստանում գործող գրավատների ու փոխանակման կետերի աշխատակիցները կրկին բողոքի ակցիա են իրականացնում կառավարության շենքի առջև: Նրանք պահանջում են վերախմբագրել «Պետական տուրքի մասին» ՀՀ օրենքում սպասվող փոփոխությունները, ըստ որոնց` 60 անգամ, այսինքն` 6000 %-ով ավելացվելու է վերոհիշյալ ոլորտների պետական տուրքը: Ըստ փոփոխված օրենքի` գրավատների համար ներկայիս 100 000 դրամի փոխարեն սահմանվելու է 6 մլն, փոխանակման կետերի համար՝ 50 000-ի փոխարեն 3 մլն դրամ պետական տուրք:

Ակցիայի մասնակիցները  հանդիպում են պահանջում վարչապետ Նիկոլ Փաշինյանի հետ:

Զուգահեռաբար, այսօր, խորհրդարանի տնտեսական հարցերի մշտական հանձնաժողովի նախաձեռնությամբ,  աշխատանքային խորհրդակցություն էր տեղի ունեցել` նվիրված փոխանակման կետերի, դիլերների և գրավատների գործունեության հարցին:

«Իմ քայլը» դաշինքի պատգամավոր Հայկ Գևորգյանը, որն ավելի վաղ տեղեկացրել էր այս մասին, նշեց, որ քննարկումը կանցկացվի արարողակարգի շրջանակներից դուրս, և այսօր իրենք ոչ մի վերջնական որոշում չեն կայացնի: