Ղազախստանցիները բողոքում են աղքատության դեմ. Տոկաև

Ղազախստանի նախագահ Քասըմ Ժոմարտ Տոկաևի կարծիքով` երկրում բողոքի ակցիաները կապված են աղքատության հետ, և իշխանությունները «լսեցին» բողոքողներին. հայտնում է РИА Новости-ն:

«Ինչ վերաբերում է ակցիայի մասնակիցներին, նրանք իսկապես փողոց են դուրս եկել` իրենց բողոքը հայտնելու: Ներկայումս վերլուծվում են նրանց պահանջները: Հիմնականում դրանք սոցիալական բնույթի են: Ես չեմ հերքում, որ այդ հարցերն առկա են: Հիմնականում դրանք կապված են աղքատության հետ: Նրանք պահանջում են կառավարությունից լուծել սոցիալ-տնտեսական խնդիրները: Իշխանությունը լսել է նրանց: Եվ մենք կաշխատենք այդ ուղղությամբ»,- ասել է նա Euronews-ին տված հարցազրույցում:

Հիշեցնենք, որ բողոքի ակցիաներն անցկացվել են Ղազախստանի նախագահի ընտրության և դրան հաջորդող օրերին, ձերբակալվածների թիվը հասնում էր 1000-ի: Ընտրությունների արդյունքում հաղթել է Քասըմ Ժոմարտ Տոկաևը, որը փոխարինել է երկիրը 30 տարի ղեկավարած Նուրսուլթան Նազարբաևին: