Այսօր աղքատության դեմ պայքարի օրն է

Հայաստանում աղքատության մակարդակը 34.1 տոկոս է, իսկ ծայրահեղ աղքատության մակարդակը` 3.6 տոկոս: Գյուղական համայնքներում աղքատության մակարդակը հասնում է 34.9 տոկոսի, սակայն քաղաքային բնակավայրերում նույնպես աղքատության գործակիցը մեծանում է: 

Աղքատության դեմ պայքարի միջազգային օրվան նվիրված միջոցառման ժամանակ այս մասին ասաց ՄԱԿ-ի մշտական համակարգող Դաֆինա Գերչեւան` հղում անելով Ազգային վիճակագրության ծառայության` 2009 թվականի տվյալներին: Նա նշեց, որ ներկայումս աշխարհի առջեւ ծառացած ամենագլխավոր մարտահրավերներն են սովն ու աղքատությունը:

Հունիսին մեկնարկել է աղքատության դեմ պայքարի «Օքսֆամ» կազմակերպության «Աճեցնենք ավելին, կերակրենք մեր երկիրը» արշավը, որն անցկացվելու է աշխարհի 45 երկրներում եւ տեւելու է չորս տարի: Արշավի հիմնական նպատակը պարենամթերքի տեղական արտադրության, սպառման, բաշխման եւ կառավարման գործընթացների բարելավումը խթանելն է, աղետների ռիսկերը նվազեցնելը եւ կլիմայական փոփոխությունների բացասական ազդեցությունը գյուղատնտեսության վրա կանխելը:

Ինչպես նշեց «Օքսֆամի» հայաստանյան գրասենյակի տնօրեն Մարգարիտա Հակոբյանը, սպասվում է, որ 2030 թվականին մեկ միլիոն մարդ կդառնա աղքատ` կլիմայական պայմանների փոփոխության հետեւանքով:

Հոկտեմբերի 17-ը որպես աղքատության դեմ պայքարի օր նշվում է դեռեւս 1987 թվականից, երբ այդ օրը 100 հազար իրավապաշտպաններ դուրս էին եկել Փարիզի փողոցներ` ի պաշտպանություն սովի, բռնությունների եւ անտարբերության զոհերի:

ՄԱԿ-ի Գլխավոր ասամբլեան  հոկտեմբերի 17-ը աղքատության դեմ պայքարի օր պաշտոնապես ճանաչել է 1992-ին: