Մենք լուրջ հաջողություններ ենք գրանցում նաև մարզական կյանքում. Արցախի պետական նախարար

Արցախի պետական նախարար Գրիգորի Մարտիրոսյանն իր ֆեյսբուքյան էջում անդրադարձել է առաջիկայում Արցախում կայանալ;իք մարզական միջոցառումներին:

«Այսօր կրթության, գիտության և սպորտի նախարար Նարինե Աղաբալյանի ուղեկցությամբ Շուշիում հաճելի հանդիպում եմ ունեցել Անկախ ֆուտբոլային ասոցիացիաների (CONIFA)` Արցախում հունիսի 1-9-ը անցկացվելիք Եվրոպայի առաջնությանը մասնակից Արցախի հավաքականի գլխավոր մարզիչ Վյաչեսլավ Գաբրիելյանի, հավաքականի մարզիկների, ինչպես նաև մարզչական կազմի պատասխանատուների հետ:

Հպարտությամբ պետք է նշեմ, որ մեր հավաքականի տրամադրվածությունը անչափ ոգևորիչ էր և հաղթանակի մեծ վստահության էր ներշնչում:

Հանդիպման ընթացքում կարևորել եմ առաջնությունն Արցախում առաջին անգամ կազմակերպելու հանգամանքը, նշել, որ այդ քայլին մենք գնացել գիտակցաբար՝ հասկանալով, որ սա ևս մեկ լավ առիթ է աշխարհին ապացուցելու, որ բացի մնացած ենթակառուցվածքներից՝ մենք լուրջ հաջողություններ ենք գրանցում նաև մարզական կյանքում և որպես հանրապետություն՝ պատրաստ ենք հավուր պատշաճի հյուրընկալել մասնակից երկրներին և երկրպագուներին։