կարևոր
2857 դիտում, 9 ամիս առաջ - 2023-08-08 23:27
Արցախ Քաղաքական

Համահայկական դաշտում մենք ունենք առաքելություն. եռամիասնության շնորհիվ է, որ մենք կարողանում ենք արձանագրել հաջողություններ. Դավիթ Իշխանյան

Ես չեմ կարծում, որ մեկ ընտրությամբ կարելի է դատել՝ ով է ընդդիմություն, ով է իշխանություն, բայց սա հարցերի հարցը չէ. Արցախի հանրային հեռուստատեսությանը տված հարցազրույցում ասել է ՀՅԴ Բյուրոյի անդամ, Արցախի ԱԺ նորընտիր նախագահ Դավիթ Իշխանյանը՝ պատասխանելով այն հարցին, որ այսօր տեղի ունեցած ընտրությունը արդյոք փաստում է, որ Արցախի ԱԺ-ում ընդդիմադիր է միայն «Միասնական հայրենիք»-ը:

«Ընդհանրապես մենք դասական իրավիճակում չենք գտնվում եւ պետք է զերծ մնանք դասական այն գնահատականներից ու մեկնաբանություններից, նաեւ այն պատկերացումներից, որ լինում է դասական իրավիճակում: Իսկ երեկվա ընտրությունները դա պարզապես քաղաքական դիրքորոշում էր, որ ցույց տվեց «Միասնական հայրենիք»-ը, մյուս խմբակցություններն էլ բնականաբար իրենց տեսակետներն ունեին եւ դրանով արտացոլվեց մեր քաղաքական կուսակցությունների ընդհանուր պատկերացումները՝ ապագային միտված»,-ասաց նա:

Իշխանյանը նշեց, որ իրավիճակը ֆորսմաժորային է եւ իր թեկնածությունն էլ ԱՀ նախագահն է առաջադրել. «Իմ համար շատ ծանր էր, երբ որ նախագահի կողմից առաջադրվեց իմ թեկնածությունը, բայց դրան նախորդել է խորհրդատվություններ՝ խորհրդարանում ներգրավված քաղաքական ուժերի ղեկավարների մակարդակով, պատգամավորական խմբակցությունների հետ, եւ երկուստեք՝ նախագահի առաջարկն ու Արցախի ՀՅԴ Կենտրոնական կոմիտեի համատեղ որոշումը արտոնելու Դավիթ Իշխանյանին, ավարտվեց խորհրդարանի նախագահի ընտրությամբ»:

Դավիթ Իշխանյանի համոզմամբ այսօրվա ընտրության նպատակը նաեւ ընդհանուր համախմբման միտումն էր՝ ներքին դաշտում, արտաքին դաշտում՝ համահայկական առումով:

«Մեզ համար ներքին կայունությունը շատ կարեւոր եւ անհրաժեշտ էր եւ դրանում մենք ունենք մեր դերակատարությունը»,- ասաց նա:

Հարցազրույցն ամբողջությամբ՝ տեսանյութում