Կառուցվող շենքը պիտի ունենա ապաստարան, քանի որ ցանկացած պահի տարածաշրջանում կարող է իրավիճակ փոխվել. Տավուշի մարզպետ

Անվտանգությունը մեր թիվ մեկ առաջնահերթությունն  է. այսօր լրագրողներին ասաց Տավուշի մարզպետ Հայկ Չոբանյանը՝ նշելով, որ  ցանկացած պահի տարածաշրջանում կարող է իրավիճակ փոխվել, ընդ որում` շատ կտրուկ:

Ըստ նրա` ցանկացած ծրագիր, նախաձեռնություն, ներդրում իրենք դիտարկում են այդ պրիզմայով։

«Եթե կառուցվում է շենք, պիտի ունենա ապաստարան, եթե ստեղծվում են մեխանիզմներ, այդ մեխանիզմները պետք է աշխատեն նաև պատերազմական կամ արտակարգ իրավիճակում: Մենք պարտավոր ենք այդպես անել»,- նշեց մարզպետը։

Հայկ Չոբանյանը տեղեկացրել է նաև, որ Տավուշի մարզի Նավուր գյուղում առաջիկա մեկ ամսում կգործարկվի խոզապուխտի արտադրության գործարան: «Արդեն իրականացվում են սարքավորումների տեղադրման աշխատանքները: Այս փուլում մեծ արտադրամաս չի լինելու, ապահովվելու է շուրջ 50 հոգու զբաղվածություն»,- ասաց մարզպետը` հավելելով, որ լինելու է մթերման կետ, այսինքն` մեծ հնարավորություն կլինի շրջակայքի համայնքների գյուղացիական տնտեսությունների համար, որոնք շուկայական գներով կմթերեն մսաթերքը: