Իրավիճակն առաջնագծում լարված է, և ցանկացած պահի ցանկացած գործողություն էլ կարող է լինել. Սեյրան Օհանյան

 Այսօր լրագրողների հետ զրույցում ՀՀ պաշտպանության նախարար Սեյրան Օհանյանը, խոսելով ղարաբաղա-ադրբեջանական շփման գծի երկայնքով ստեղծված իրադրության մասին, նշեց, որ ՀՀ ՊՆ-ն և Արցախի ՊԲ-ն համապատասխան վերլուծություններ են կատարում իրադրության գնահատման, հակառակորդի,ուժերի հետ կապված՝ անելով նաև հետևություններ: «Իհարկե այսօր իրավիճակն առաջնագծում լարված է և ցանկացած ժամանակ ցանկացած գործողություն էլ կարող է լինել: Հայկական բանակը` հանձինս ԼՂՀ ՊԲ-ի, այսօր իր առջև դրված խնդիրները իրականացնում է բարձր մակարդակով: Եթե դուք իմանաք, թե ինչ է նշանակում պաշտպանություն, ինչ է նշանակում պաշտպանության խորքում համապատասխան մարտավարական գործողություններ, հատկապես վաշտ, դասակ օղակներում, ապա չեք կարող ասել` պաշտոնանկություններ կան, թե չկան: Պաշտոնանկությունները նախ և առաջ ԼՂՀ-ի պաշտպանության նախարարի խնդիրն է: Խորհուրդ կտայի փառաբանել այն հերոսներին, ովքեր նույնիսկ իրենց կյանքի գնով հերոսացել են, և ովքեր որ բարձր են պահել մեր ազգի արժանապատվությունը»,- ասաց նախարարը:

Ինչ վերաբերում է ռուսական զենքի ներմուծմանը՝  նախարարը վստահեցրեց, որ համապատասխան աշխատանքներ են տարվում` ռազմատեխնիկական համագործակցության տեմպերի արագացման ուղղությամբ: Դիտարկմանը, թե այսօր կարծիքներ են հնչում, որ մեր զինված ուժերը պետք է ինչ-որ կերպ առաջ գնան, Օհանյանը առաջարկեց, որպեսզի յուրաքանչյուրն իր կարծիքը թողնի իր համար. «Ռազմաքաղաքական որոշումները քննարկվում են համապատասխան ատյաններում»: