Եվրամիությունը պետք է հստակ ուղերձ հղի Թուրքիային. Ցիպրաս

Հունաստանի վարչապետ Ալեքսիս Ցիպրասն անդրադարձել է օրեր առաջ Թուրքիայի` Կիպրոս կղզու արևմտյան ջրային տարածքներում հորատման աշխատանքներին: Նա Ռումինիայում անցկացված` ԵՄ առաջնորդների գագաթնաժողովից հետո արած հայտարարության մեջ նշել է, որ Կիպրոսի նախագահ Նիկոս Անաստասիադիսի հետ այս հարցը բերել են ԵՄ օրակարգ. հաղորդում է ensonhaber.com կայքը:

«Եթե Թուրքիան շարունակի իր այս սադրիչ դիրքորոշումը, մայիս և հունիս ամիսներին տեղի ունենալիք գագաթնաժողովներում ԵՄ-ն անհրաժեշտ քայլեր և միջոցներ պետք է կիրառի: Թուրքիան, միակողմանի քայլերի փոխարեն, այլ երկրների նման պետք է գա սեղանի շուրջը և խոսի»,– նշել է Ցիպրասը:

Նա նաև հավելել է, որ Թուրքիայի հետ առաջացած խնդիրները երկկողմանի չեն, այլ ամբողջ Եվրոպայի խնդիրներն են, և ԵՄ-ն պետք է պաշտպանի Միջերկրական ծովի արևելյան շրջաններում էներգետիկ աղբյուրներն ու աշխարհաքաղաքական շահերը: Ցիպրասը կոչ արել. «ԵՄ-ն պետք է հստակ ուղերձ հղի Թուրքիային»:

Կիպրոսի նախագահ Անաստասիադիսն էլ, իր հերթին, կոչ է արել ԵՄ-ին` համատեղ գործողություն իրականացնել Թուրքիայի դեմ:

Նշենք, որ Թուրքիան մայիսի 4-ին Կիպրոսի ջրային տարածք էր հանել «Ֆաթիհ» կոչվող հորատող նավը` գազի և նավթի որոնողական աշխատանքների համար, ինչից հետո ԱՄՆ-ը, ԵՄ-ն, Մեծ Բրիտանիան և այլ պետություններ իրենց դժգոհությունն են հայտնել Թուրքիային այդ քայլի առնչությամբ: