Միտքը վառ են պահում, երբ ուրախանալու սիրտ կա, դուք ուրախանալու սիրտ տվեք

Երևանի քաղաքապետարանն ու մարզպետարանները հրապարակել են, թե ինչ միջոցառումներ են նախատեսվում Քաղաքացու օրը: «Միտքդ վա՛ռ պահիր» խորագիրն ընտրած իշխանությունները, թվում էր, այնպիսի ոգեցունց միջոցառումներ են իրականացնելու, որ հոգիներս փառավորվի, քաղաքացիներն էլ իրենց երկրի թիվ մեկ դեմքը զգան:

Քննարկումներ, հանդիպումներ, ներկայացումներ, ծառատունկ, ցուցադրություն և, իհարկե, ավանդական եզրափակիչ հրավառություն ` գմփ-գմփ-հու: Նորեկները, կարծես, ալարել են նորմալ բան մտածել կամ չեն կարողացել դիմել համապատասխան մարդկանց, որ հուշեն` ինչպես տարբերվել նախկիններից, ու «քոփի-փեսթ» են արել Երևանի օրվա տոնակատարությունների ցանկը:

Ամենազավեշտալին «քննարկումներն են» այս կամ այն համայնքի ուսումնական հաստատություններում կամ հրապարակներում: Նման քննարկումները, հարգելի' նորկեներ, հատկապես փոքր համայնքներում ամեն օր էլ լինում են` առանց բյուջեից 250 հազար դոլար հատկացնելու: Մարդիկ թե՛ իրենց ընտանիքների, թե՛ մեր երկրի, թե՛ Երկիր մոլորակի դարդուցավերով այնպիսի քննարկումներ են ունենում, որ գործադիրի ու օրենդիրի ներկայացուցիչները չեն էլ կարող պատկերացնել:

Միտքը վառ են պահում վառ գաղափարներով, մարդուն որպես անհատականություն, քաղաքացի, որոշում կայացնող դաստիարակելով ու ընկալելով: Միտքը վառ պահելու համար երկրի «հպարտ ու արժանապատիվ» քաղաքացուն չեն ստիպում վարչապետին տեսնելուն պես ձգվել, հակառակ դեպքում` դիմում գրել ու հեռանալ: Հետո էլ արդարանում են, թե` «է, թող դիմում չգրեր »: Հասկանո՞ւմ եք, երկրի վարչապետի խոսքը լուրջ ընդունած պետական ծառայողին երկրի թիվ մեկ դեմքն անուղղակի տեքստով ասում է` իմ ասածը պետք չէր լուրջ ընդունել:

Միտքը վառ են պահում` քաղաքացիների համար սոցիալապես ապահով կյանք ապահովելով. կեցությունն է որոշում գիտակցությունը: Միտքը վառ են պահում` սահման պահող ու քաղաքի կենտրոնում բնակվող երեխաների համար գրեթե նույն պայմաններն ապահովելով: Միտքը վառ են պահում` հանուն երկրի բարօրության, զարգացման ու թռիչքաձև աճի` պետական պարգևավճարներից հրաժարվելով ու հզոր պետություն ունենալու սուրբ գաղափարն ուղեղի մի անկյունում  շարունակ փայփայելով: Միտքը վառ են պահում, երբ այն մերժում է խորոված անելու համար փողոց փակելու համառությունը, հասարակությունը մերոնքականների ու ձերոնքականների բաժանելու մոլուցքը: Միտքը վառ են պահում, երբ ուրախանալու սիրտ կա, դուք ուրախանալու սիրտ տվեք մարդկանց:

Վրույր Սևակ