Երբ մարդը ոտք է դնում Սպիտակ տուն, միտքը փոխում է

Գլենդելի քաղաքապետ Արա Նաջարյանը ԱՄՆ նախագահ Բարաք Օբամայի` «ցեղասպանություն» բառը չարտասանելը որակում է որպես խաբեություն:

«Հայ համայնքը հիասթափված է, առավել եւս նրանք, ովքեր շատ ջանք են թափել, որ հենց Օբաման ընտրվի, քանի որ ասել էր, որ պետք է ընդունի Ցեղասպանությունը»,- նշեց նա:

Քաղաքապետի կարծիքով` իրենք երբեք չպիտի հույսեր կապեն ընտրապայքարի ժամանակ տրված խոստումների հետ:

«Երբ մարդը ոտք է դնում Սպիտակ տուն, միտքը փոխում է: Իմ հանցանքն է, որ ժամանակին չեմ օգտագործել առիթը` զրուցելու Օբամայի հետ. 1980-ին հայ աշակերտական միության անդամ էի, եւ Օբաման իմ դասընկերն էր: Այն ժամանակ, եթե գոնե մեկ անգամ նրան մասնակից անեինք մեր` հայ տղաների զրույցներին, թերեւս միտքը կփոխեր»,- ասաց Ա. Նաջարյանը:

Նա կարծում է, որ առաջիկա ընտրություններին Օբամայի վերընտրվելու հնարավորությունը մեծ է: