Կոլորադոյի բնակիչների համար կարևոր է հիշել հայերի դեմ կազմակերպված ցեղասպանությունը. նահանգում ապրիլը հռչակվել է «Ցեղասպանության իրազեկման ամիս»

ԱՄՆ Կոլորադո նահանգի նահանգապետ Ջարեդ Պոլիսն ապրիլը հռչակել է «Ցեղասպանության իրազեկման ամիս»: Այս մասին տեղեկացնում է ԱՄՆ Հայ դատի հանձնախումբը`միաժամանակ մանրամասնելով, որ դա վերաբերում է հայերի, հույների և այլ ազգերի դեմ իրագործված ցեղասպանություններին:

Նահանգապետի հայտարարության մեջ նշված է նաև, թե որքան կարևոր է ցեղասպանությունների մասին իրազեկվածությունը, ինչպես նաև մարդկության դեմ նման հանցանքների կազմակերպիչների և դրանք ժխտողների դատապարտումը:

«Կոլորադոյի բնակիչների համար կարևոր է հիշել և ոգեկոչել 20-րդ դարում հայերի, հրեաների, կամբոջացիների, բոսնիացիների, ռուանդացիների և այլ ազգերի, ինչպես նաև 21-րդ դարում դարֆուրցիների, ռոհինջաների, Մերձավոր Արևելքում քրիստոնյաների, եզդիների դեմ կազմակերպված ցեղասպանությունները»,- շեշտել է նահանգապետը:

Հայոց ցեղասպանությունը պաշտոնապես ճանաչվել է ԱՄՆ 50 նահանգից 49-ի կողմից:

Հիշեցնենք, որ օրեր առաջ, Լոս Անջելեսի շրջանային խորհրդի ներկայացուցիչներ Ջենիս Հանի և Քեթրին Բարգերի նախաձեռնությամբ, ապրիլը հայտարարվեց «Հայոց պատմության ամիս»: