Դիվանագիտական աշխարհին բնորոշ հայտարարություն է. Վլադիմիր Վարդանյանը՝ ԵԱՀԿ ՄԽ հայտարարության մասին

ԱԺ պետաիրավական հարցերի մշտական հանձնաժողովի նախագահ Վլադիմիր Վարդանյանի գնահատմամբ` ԵԱՀԿ Մինսկի խմբի համանախագահների  հայտարարության որևէ դրույթ չի խոչընդոտում Արցախի բնակչության իրավունքների պաշտպանությանը:

Այսօր խորհրդարանական ճեպազրույցների ժամանակ նա ասաց, որ բանակցային գործընթացում կարող են հնչել տարբեր դիրքորոշումներ, բայց վարչապետի վերջնական դիրքորոշումը մեզ հայտնի է՝ բանակցային գործընթացի և հակամարտության կարգավորման համար պիտի փնտրել լուծումներ, որոնք ընդունելի կլինեն և՛ Հայաստանի, և՛ Արցախի, և՛ Ադրբեջանի համար:

«Այդ տեսանկյունից, իմ կարծիքով, ՄԽ համանախագահները փորձել են ամփոփել դեռևս մինչև թավշյա հեղափոխությունը ձևավորված օրակարգը և քննարկել այն հիմնական հարցերը, որոնք բարձրացված էին եղել այն ժամանակահատվածում», - ասաց Վարդանյանն ու ավելացրեց, որ համանախագահների հայտարարությունը դրական է համարում այն առումով, որ կողմերին, ըստ էության, ևս մեկ անգամ կոչ է արվում հակամարտությունը կարգավորել բացառապես խաղաղ միջոցներով՝ ՄԱԿ-ի կանոնադրության մեջ ամրագրված սկզբունքների հիման վրա:

«Այդ ձևաչափը նոր չէ: Այդ կարգի հայտարարություններ արվել են նաև նախկինում, պետք չէ ինչ-որ բան կտրել կոնտեքստից և փորձել ներկայացնել որպես ինչ-որ հեղափոխական բնույթի հայտարարություն: Դա դիվանագիտական աշխարհին բնորոշ հայտարարություն է», - նշեց Վարդանյանը: