Եգիպտոսը մեղադրել է Թուրքիային ահաբեկիչներին աջակցելու մեջ

Եգիպտոսի արտաքին գործերի նախարարի խոսնակ Ահմեթ Հաֆիզը նշել է, որ Թուրքիայի նախագահ Ռեջեփ Թայիփ Էրդողանն աջակցում է ահաբեկիչ «Մուսուլման եղբայրներին»: Եգիպտոսում տեղի ունեցած Եվրամիություն-Արաբական պետությունների լիգա գագաթնաժողովից հետո, թեժացած թուրք-եգիպտական հարաբերությունների վերաբերյալ հայտարարություն անելով, Հաֆիզն անդրադարձել է նաև Թուրքիայի քաղբանտարկյալներին` նշելով, որ նրանց թիվը հասնում է 70 հազարի, 175 լրագրող ձերբակալված է և 130 հազար մարդ այլակարծության համար ազատվել է աշխատանքից: «Այս բոլոր թվերը ստվեր են գցում Էրդողանի ասածների ճշմարտացիության վրա»,- ըստ haberler.com կայքի` ասել է նա:

Նշենք, որ օրեր առաջ Էրդողանը քննադատել էր գագաթնաժողովը` մասնավորապես նշելով, որ ԵՄ-ն աջակցում է 6 անմեղ երիտասարդներին մահապատժի ենթարկած բռնակալ` Եգիպտոսի նախագահ Աբդուլֆեթթահ ալ Սիսիին: