Հանդիպում ՀՅԴ Արցախի Երիտասարդական Միության և «Ապառաժ» ՀԿ-ի մասնակցությամբ

Փետրվարի 21-ին Ստեփանակերտի «Արմատներ» կենսակենտրոնում կայացել է հանդիպում Արցախի խուլերի միության անդամների և Արցախի Ազգային Ժողովի «Դաշնակցություն» խմբակցության պատգամավորներ Արմեն Սարգսյանի, Ալյոշա Գաբրիելյանի և Ռիտա Մնացականյանի հետ: Հանդիպումը ՀՅԴ Արցախի Երիտասարդական Միության և «Ապառաժ» ՀԿ-ի հետ համատեղ իրականացված ծրագրի երկրորդ փուլն է:

Հանդիպման ընթացքում ամփոփվել են փետրվարի 14-ին կայացած պետական, հասարակական տարբեր շրջանակների հետ քննարկման արդյունքները, հնչած բողոքներն ու առաջարկները: «Դաշնակցություն» խմբակցության պատգամավորները նշել են, որ շատ աշխատանք կա կատարելու՝ հասարակությանը լսողական խնդիրներ ու ընդհանրապես հաշմանդամություն ունեցող մարդկանց լիարժեք ինտեգրելու ուղղությամբ: Այս և նախորդ հանդիպումներին հնչած խնդիրները լինելու են խմբակցության պատգամավորների ուշադրության կենտրոնում:

ՀՅԴ Արցախի Երիտասարդական Միության Կենտրոնական Վարչության ներկայացուցիչ Բենո Միրզոյանը նշել է, որ Արցախի Հանրապետության մշակույթի, երիտասարդության հարցերի և զբոսաշրջության նախարարության ֆինանսավորմամբ իրականություն դարձած ծրագիրը կարելի է համարել հաջողված: Երկու օրերի ընթացքում լիարժեք տեղեկություն են ստացել ոլորտում առկա խնդիրների մասին և ևս մեկ անգամ բարձրաձայնել դրանք: Նա նաև ավելացրել է, որ ՀՅԴ ԱԵՄ-ը կապ է պահելու խուլերի միության անդամների հետ, նրանց մասնակից է դարձնելու միության միջոցառումներին և այժմ քննարկում են համատեղ են ծրագրեր իրականացնելու հարցը: