Գուցե մեզ հայհոյում են. թուրք պատգամավորը` Փայլանի հայերեն ելույթի ժամանակ

Երեկ աշխարհում նշվում էր Մայրենի լեզվի միջազգային օրը:

Թուրքիայի Ազգային մեծ ժողովի ամբիոնից իրենց մայրենի լեզվով ելույթներ են ունեցել գլխավոր ընդդիմադիր Հանրապետական-ժողովրդական կուսակցության պատգամավոր, լազ Մեհմեդ Բեքարօղլուն և քրդամետ Ժողովուրդների դեմոկրատական կուսակցության հայ պատգամավոր Կարո Փայլանը. հայտնում է siyasihaber4.org կայքը:

Ազգային ժողովի ամբիոնից օտար լեզվով ելույթ ունենալը հարուցել է թուրք պատգամավորների  մեծամասնության դժգոհությունը: Մասնավորապես` Փայլանի ելույթի ժամանակ «Ազգայնական շարժում» կուսակցության պատգամավորներ Բաքի Շիմշեքը և Ումիթ Յըլմազը բացականչել են. «Սա ՄԱԿ-ն է՞: Պարո'ն նախագահ, թարգմանիչ բերեք: Գուցե մեզ հայհոյում են»:

Փայլանը շարունակել է ելույթը` ասելով. «Հարգելի' նախագահ, իմ մայրենին` ՅՈՒՆԵՍԿՕ-ի կողմից անհետացման վտանգի տակ համարվող արևմտահայերնն է և ցանկանում եմ ելույթս արևմտահայերեն ասել: Մենք երազում ենք ունենալ Թուրքիա, որտեղ բոլոր մայրենի լեզուները եղբայրաբար, խաղաղ կապրեն: Դրա համար խնդրում եմ Ազգային ժողովին` անհրաժեշտ միջոցառումներ ձեռնարկել: Այդ նպատակով օրինագծեր ունենք: Ցանկանում եմ հավատալ, որ մեր բոլոր պատգամավորները բոլոր մայրենի լեզուների նկատմամբ հարգանք կցուցաբերեն, և  Ազգային ժողովը անհրաժեշտ միջոցառումներ կձեռնարկի»: