Հեղափոխություն է եղել, բայց Սահմանադրությունը չի փոխվել. արտախորհրդարանական ուժերն հանդես են գալիս առաջարկով

Արտախորհրդարանական տասը ուժ միավորվել են «Նոր Սահմանադրություն» նախաձեռնության շուրջ, հուշագիր են ստորագրել ու պատրաստվում են նոր Սահամանդրություն գրել, որը կարտահայտի հասարակության բոլոր շերտերի տրամադրություններն: Այս մասին այսօր լրագրողների հետ հանդիպման ժամանակ ասացին վերոնշյալ խմբի մեջ ներառված երեկ կուսակցության ներկայացուցիչները` «Ազգային առաջընթաց» կուսակցության նախագահ Լուսինե Հարոյանը, «Հայ կառուցողական կուսակցություն» նախագահ Անդրիաս Ղուկասյանն ու «Նժդեհյան ցեղակրոն» կուսակցության նախագահ Գևորգ Հովսեփյանը:

Հովսեփյանն իր խոսքում ասաց, թե սահմանադրությունը քաղաքական կուսակցությունների գործ չէ, այլ պատկանում է ազգին և գրվում է արժեհամակարգի հիման վրա: Նշեց, թե Սահմանադրությունը մեկ կամ երկու կուսակցության մենաշնորհը չէ, սահմանադրական գործընթացը շարունակական գործընթաց է, և ազգը պետք է տեր լինի իր ամեն արժեքին:

«Սահմանադրություն բառը հենց հուշում է, որ ազգը սահմանում է իր օրենքները, իղձերը, պետք է հասկանա՝ որտեղից է գալիս և ինչ է ուզում: Սահմանադրությունն այնքան էլ դեկլարատիվ չէ»,- ասաց նա :

Լուսինե Հարոյանն էլ նշեց, որ առաջին դեպքն է, երբ հարթակ է ստեղծվում համաժողովրդական կոնսոլիդացման համար, և նախաձեռնությունը բաց է բոլորի համար: Հստակեցրեց, որ այնպես չպետք է լինի, որ կուսակցությունները գրեն Սահմանադրություննու վերջ:  Տասը կուսակցությունները, նկատեց նա, կհամակարգեն այդ առաջարկները, այս պարագայում կունենանք ժողովրդավարական Սահմանադրություն:

Ասուլիսի մյուս բանախոս Անդրիաս Ղուկասյանը նշեց, որ մի քանի գործոն կա, որ պատճառն են այս նախաձեռնության: Նախ` մայր օրենքը չի ունեցել այն հանրային աջակցությունը, որը պետք է Սահմանադրությունը՝ որպես գործոն, ունենա, բացի այդ` թերություններ կան այսօրվա Սահմանադրության մեջ

«Նախկինում եթե հանրապետականները հայտարարում էին, որ իշխանությունն անցնում է Մելիք Ադամյանի փողոցով, ապա այսօրվա իշխող կուսակցությունը թեև նման բան չի հայտարարում, սակայն, ըստ էության, տրամաբանությունը նույնն է: Սահմանադրական բարեփոխման առաջարկը նաև տրամաբանական է այն քաղաքական ընթացքի տեսանկյունից, որ երկրում տեղի է ունեցել հեղափոխություն, ինչը պետք է բերի սահմանադրական կարգի փոփոխության, եթե դա տեղի չի ունենում, ուրեմն ստացվում է, որ տեղի է ունեցել իշխանափոխություն»,- ասաց նա: