Մինասի «Գիշեր» որմնանկարը կործանման եզրին է. Արման Ավետիսյան

Մինաս Ավետիսյանի «Գիշեր» որմնանկարը կործանման եզրին է, բայց այն փրկելու հնարավորություն դեռ կա. այսօր լրագրողների հետ զրույցում ասաց  անվանի նկարչի որդին` Ջաջուռի թանգարանի տնօրեն Արման Ավետիսյանը:

Նա փաստեց, որ անցյալ տարի դիմել են թե’ մշակույթի նախարարություն, թե’ վարչապետին, սակայն հարցը դեռ լուծում չի ստացել:

«Մինաս Ավետիսյան» մշակութային-բարեգործական հիմնադրամի գործադիր տնօրեն Ազատ Թովմասյանի խոսքով էլ` ինքը գրավոր դիմում է գրել պատկան մարմիններին դեռ 2018-ին: «Դիմել եմ այն ժամանակվա նախարար Լիլիթ Մակունցին, բայց արձագանք մինչ օրս չկա»,- հայտնեց նա:

«Գիշեր» որմնանկարը ստեղծվել է 1978 թվականին: Որմնապատկերը երկու է մասից կազմված`«Ցերեկ» և «Գիշեր» անվանումներով: Առաջինն այլևս հնարավոր չէ վերականգնել:

Արման Ավետիսյանը տեղեկացրեց, որ «Մինաս Ավետիսյան» հիմնադրամի միջոցով արդեն կազմակերպվել է Մինաս Ավետիսյանի 8 որմնանկարի վերականգնում, որոնցից միայն մեկը չի տեղաշարժվել՝ «Հայաստան» որմնանկարը Վահրամաբերդ համայնքում։ Վերականգնվել են նաև Ռաֆիկ Աթոյանի և Հակոբ Հակոբյանի որմնանկարները` ԱՄՆ կառավարության ֆինանսավորմամբ:

«Գիշեր»-ը վերականգնելու համար, ըստ նախնական հաշվարկների, անհրաժեշտ է մոտ 25.000 ԱՄՆ դոլար: «Մասնագետների խնդիր չունենք: Մեր հայ մասնագետները կկարողանան վերականգնել որմնանկարը: Միակ  խնդիրը նյութերն են: Դրանք Հայաստանում չկան: Պետք է Իտալիայից պատվիրենք»,- նշեց Արման Ավետիսյանը:

Լրագրողների հարցին, թե ինչպե՞ս է հնարավոր լուծել, առհասարակ, որմնանկարները կործանումից փրկելու խնդիրը, նա պատասխանեց. «Լուծման միակ տարբերակը մոնումենտալ արվեստի թանգարանի ստեղծումն է»: