Թուրքական մամուլն անդրադարձել է Մակրոնի` Հայոց ցեղասպանության հիշատակի օր հռչակելու մասին որոշմանը

Տարիներ շարունակ Աֆրիկայի բնական հարստությունը թալանած և Աֆրիկայի ժողովրդին սովի մատնած Ֆրանսիա պետության նախագահ Էմանուել Մակրոնն ապրիլի 24-ը Ֆրանսիայում հռչակել է որպես Հայոց ցեղասպանության հիշատակման օր: Այսպես է  Ֆրանսիայի նախագահ Էմանուել Մակրոնի՝ Ֆրանսիայում ապրիլի 24-ը Հայոց ցեղասպանության հիշատակի օր հռչակելու մասին որոշմանն արձագանքել թուրքական haber7.com  կայքը:

Թուրքական կայքի տեղեկացմամբ` Ֆրանսիայի հայկական կազմակերպությունների խորհրդի նիստին մասնակցած Մակրոնը դրանով ի կատար է ածում նախընտրական շրջանի` իր խոստումը:

BBC-ի թուրքական ծառայությունը նույնպես, անդրադառնալով Մակրոնի որոշմանը, նշել է, որ դա նրա նախընտրական խոստումներից է: Լրատվամիջոցը հրապարակել է եվրոպական այն բոլոր երկրների անունները, որոնք ճանաչել են Հայոց ցեղասպանությունը, և հավելել, որ պաշտոնական Անկարան հերքում է ցեղասպանության վարկածն ու շեշտում, որ «1914 – 1921 թվականներին տեղի ունեցած փոխադարձ բախումների ժամանակ» մահացել են նաև բազմաթիվ թուրքեր: