«Կողմ եմ «Ակն ընդ ական, ատամն ընդ ատաման» սկզբունքին. Նաիրա Զոհրաբյան

ԲՀԿ պատգամավոր Նաիրա Զոհրաբյանը կողմ է քննադատություններին, սակայն խոստանում է, որ կոռեկտության սահմանները հատողներին կրկնակի ուժեղ պատասխան կտրվի։

«Կաշխատենք, կտեսնենք` ինչպիսի ընդդիմություն կլինի ԲՀԿ-ն, և, ընդհանրապես, ինչպիսին կլինի այս խորհրդարանը»,- խորհրդարանում լրագրողների հետ զրույցում ասաց ԲՀԿ խմբակցության պատգամավոր Նաիրա Զոհրաբյանը:

«Որևէ մեկին խորհուրդ չեմ տալիս կանխակալ գնահատականներ հնչեցնել, հատկապես` ԲՀԿ-ի հասցեին։ Մենք քանիցս ասել ենք՝ կողմ ենք բոլորի հետ կոռեկտ փոխհարաբերություններին, ով խախտեց կոռեկտության սահմանը, բնականաբար, պատասխանը մի քանի անգամ ավելին է ստանալու։ Ես կողմ եմ «Ակն ընդ ական, ատամն ընդ ատաման» սկզբունքին», - ասաց նա` անդրադառնալով ԼՀԿ-ի կողմից ԲՀԿ-ի հասցեին հնչեցվող քննադատություններին։

Զոհրաբյանը նորմալ է համարում, որ իշխող քաղաքական ուժը միտված է քվեարկել երկրորդ ուժի թեկնածուի օգտին։ Նա նշեց, որ փորձելու են քաղաքական նոր մշակույթ բերել ԱԺ: «Ռինգի, բոքսի քաղաքականությունը` ով ավելի շատ կբղավի, ավելի ընդդիմադիր է, կարծում եմ` փակված է։ Նոր փուլ ենք ուզում անցնել»,- ասաց նա։