Լաբորատորիաները պատկանում են ՀՀ-ին, վերահսկվում մեր կողմից. ՀՀ ԱԳՆ խոսնակը՝ Լավրովի հայտարարության մասին

Սանիտարահամաճարակային վերահսկողության ոլորտը հայ-ռուսական օրակարգի մի մասն է, և այդ հարցի շուրջ համագործակցության երկխոսություն կա: Այս մասին լրագրողների հետ ճեպազրույցում հայտարարեց ՀՀ արտաքին գործերի նախարարության մամուլի խոսնակ Աննա Նաղդալյանը: 

«Ինչ վերաբերում է կենսաբանական լաբորատորիաներին, պետք է պարզապես վերահաստատել, որ դրանք պատկանում են Հայաստանին, վերահսկվում են մեր կողմից, այդտեղ աշխատում են բացառապես հայ փորձագետներ: Այդ լաբորատորիաներն ունեցել են և կունենան բացառապես քաղաքացիական բնույթ»,- նշեց նա:

Ինչ վերաբերում է օտարերկրյա զինծառայողների ներկայության արգելքին, Նաղդալյանը պատասխանեց. «Հայաստանի  պարագայում ռազմական ներկայության խնդիր չկա, Հայաստանը ոչ մի բանակցություն չի վարում երրորդ երկրի զինվորականների տեղակայման շուրջ»:

Հիշեցնենք, որ օրեր առաջ, ուղիղ եթերում պատասխանելով «Կոմսոմոլսկայա պրավդա»-ի ընթերցողների հարցերին, ՌԴ ԱԳ նախարար Սերգեյ Լավրովը հայտարարեց, որ Մոսկվան ու Երևանը շուտով փաստաթուղթ են ստորագրելու, որը կերաշխավորի Հայաստանի կենսալաբորատորիաներում օտարերկրյա զինծառայողների բացակայությունը:

Իր հերթին ՀՀ-ում ՌԴ արտակարգ և լիազոր դեսպան Սերգեյ Կոպիրկինը լրագրողների հետ հանդիպման ժամանակ ընդգծեց՝ «որևէ արգելքի մասին  խոսք լինել չի կարող, քանի որ խոսքը երկու ինքնիշխան և իրավահավասար պետությունների մասին է»՝ հավելելով, որ խնդրի շուրջ կառուցողական երկխոսություն է ընթանում: