Ընտրությունների արդյունքները չճանաչելը ծառայում է ՌԴ-ի շահերին. Զուրաբիշվիլի

Վրաստանի նախագահական ընտրություններում հաղթանակ տարած անկախ թեկնածու Սալոմե Զուրաբիշվիլին կարծում է, որ ընդդիմության` քվեարկության արդյունքները չճանաչելու կոչերը ծառայեցին ՌԴ-ի շահերին: Այդ մասին նա ասել է Reuters-ի հետ զրույցում. հայտնում է ekhokavkaza.com-ը:

«Դա հենց այն է, ինչը ցանկանում է տեսնել Ռուսաստանը` մասնատված և թույլ Վրաստան` վարկաբեկված նախագահով, որի լեգիտիմությունը սպառնալիքի տակ է», -ասել է Զուրաբիշվիլին` նշելով, որ մտադիր է հաշտեցնել Վրաստանի մասնատված հասարակությանը:

Նոյեմբերի 28-ին Վրաստանում կայացել են նախագահական ընտրություններ, որոնցում հաղթել է իշխող կուսակցության աջակցությունը վայելող Սալոմե Զուրաբիշվիլին: Ընդդիմության թեկնածու Գրիգոլ Վաշաձեն չի ընդունում ընտրությունների արդյունքները. երեկ Թբիլիսիում կայացել է նրա կողմնակիցների բազմահազարանոց ցույցը: Վաշաձեն պահանջում է արտահերթ խորհրդարանական ընտրություններ անցկացնել: