Պռոշյանի բնակիչները փակել էին ճանապարհը. պահանջել են բացահայտել անասնագողության դեպքերը

Այսօր Պռոշյան համայնքի բնակիչները փակել էին դեպի Երևան տանող ճանապարհահատվածը: Այս մասին Yerkir.am-ի հետ զրույցում հայտնեց Պռոշյանի համայնքապետ Արթուր Մուրադյանը:

Նրա խոսքով` բնակիչների բողոքի պատճառն այն է, որ երկար ժամանակ է՝ գյուղում տեղի են ունենում անասնագողության դեպքեր, սակայն ոստիկանությունը մինչ օրս չի հայտնաբերել անասնագողերին։

«Ճանապարհն արդեն բաց է: Անասնագողության պատճառով էին փակել, պահանջում էին բացահայտել երկար տարիներ համայնքից կատարվող անասնագողության դեպքերը: Երեկ չէ առաջին օրն էլ մեր համագյուղացիներից 5 կով են գողացել, դա էլ  ճանապարհ փակելու առիթ դարձավ»,- ասաց Մուրադյանը:

Ըստ նրա` ճանապարհը փակած քաղաքացիների հետ հանդիպել են Կոտայքի փոխմարզպետ Վասակ Վարդանյանը և Եղվարդի ոստկանության բաժնի պետ Դավիթ Գևորգյանը: Ի վերջո, ձեռք է բերվել համաձայնություն, որ կարճ ժամանակում գողությունը կբացահայտվի, ինչից հետո բնակիչները համաձայնել են բացել ճանապարհը: