Մարդիկ հողմաղացներ են հորինում. Արայիկ Հարությունյանը հերքում է, որ իրենց ցուցակում հեղինակազրկվածներ կլինեն

ԿԳ նախարարի պաշտոնակատար Արայիկ Հարությունյանը արտահերթ խորհրդարանական ընտրություններին կառաջադրվի ռեյտինգային կարգով: Այս մասին խորհրդարանում լրագրողների հետ զրույցում ասաց նա և նշեց, որ առաջադրվելու է Երևանի Շենգավիթ և Մալաթիա-Սեբաստիա վարչական շրջաններն ընդգրկող թիվ 3 ընտրատարածքում։

Իսկ թե ընտրություններից հետո կգա՞ խորհրդարան, թե՞ կմնա գործադիրում, Հարությունյանը պատասխանեց, որ այս պահին որևէ որոշում չկա, պարզ կդառնա` ըստ արդյունքների և թիմի հետ քննարկումների։

Դիտարկմանը` դժգոհություններ կան, որ նախկին իշխանությունների ժամանակ պաշտոն զբաղեցրած և հեղինակազրկված անձինք կարող են լինել իշխող ուժի ցուցակում, Հարությունյանը պատասխանեց, որ իրենք չեն անդրադառնում այդ մեկնաբանություններին:  «Որովհետև մարդիկ էլի հողմաղացներ են հնարում, պայքարում դրանց դեմ, բայց դրանք իրականում չկան: Ես կոչ կանեմ սպասել, առաջիկայում ցուցակը կհրապարակվի, նոր ինքներդ կարող եք գնահատական տալ»,- ասաց նա:

Իսկ թե ովքե՞ր են լինելու այն մի քանի ՀՀԿ-ականները, որոնք, վարչապետի պաշտոնակատարի խոսքով, լինելու են «Իմ քայլը» դաշինքի նախընտրական ցուցակում, Հարությունյանը չմանրամասնեց: 

Նա անդրադարձավ նաև ՔՊ-ին անդամագրվելու հերթերին:  «Մենք շատ լուրջ ֆիլտրեր ենք դրել, որովհետև անմիջապես հեղափոխությունից հետո սկսեցին հազարներով անդամագրվել ՔՊ-ին»,- ասաց Հարությունյանը:

Իսկ թե որո՞նք են կուսակցության մշակած ֆիլտրերը, նշեց` նախկինում ՔՊ կուսակցության գործունեությանը, ինչպես նաև վերջին քաղաքական պրոցեսներին մասնակցությունը։