Իմ հերոսը ոչ թե ՊՊԾ գունդը գրավողն է, այլ գնդապետ Վանոյանը. Շարմազանովը դեմ է «Սասնա ծռեր»-ի անդամների համաներմանը

Համաներումը մարդասիրական ակտ է, և որևէ մեկը չի կարող դրան դեմ լինել. համաներման հարցի քննարկման ժամանակ հայտարարեց ԱԺ փոխխոսնակ Էդուարդ Շարմազանովը: Նա ողջունեց համաներում հայտարարելու գաղափարը և նշեց, որ այստեղ երկու կարծիք լինել չի կարող:

«Ես համաներմանը կողմ եմ, բայց ՊՊԾ գունդը գրավողներին համաներում անելուն` դեմ»,- հայտարարեց պատգամավորը` ընդգծելով, որ ՊՊԾ գնդի գրավումը հարձակում էր Հայաստանի Հանրապետության վրա:

«Ես որևէ տարբերություն չեմ տեսնում ՊՊԾ գնդի գրավման, ՀՀ սահմանի դեմ ոտնձգության կամ Արցախում կանգնած մեր զինվորի վրա հարձակման միջև: ՊՊԾ գնդում զոհված գնդապետ Վանոյանը պաշտպանում էր բոլորիս պատիվը և ՀՀ շահերը: Եվ իմ հերոսը ոչ թե ՊՊԾ գունդը գրավողն է, այլ գնդապետ Վանոյանը: Մենք ի՞նչ աչքերով ենք նայելու այդ մարդկանց ընտանիքներին, երբ ՊՊԾ գունդը գրավողներին համաներման ակտով ուզում ենք ազատ արձակել: Մենք սրանով ական ենք դնում մեր պետականության տակ»,- հայտարարեց Շարմազանովը:

Նրա խոսքով` իր համար երկրորդական է, թե ով է վարչապետը, կարևորը Հայաստանի Հանրապետությունն է: «Եթե նորից նման բան լինի, նորից պետք է համաներե՞նք: Մենք ստեղծում ենք նախադեպ, որով ասում ենք՝  դու հարձակվի ՀՀ-ի վրա, մենք վաղը կհամաներենք: Սա անթույլատրելի է, և կրկնակի անթույլատրելի է ոստիկանապետի ու ուժային կառույցների քար լռությունը»,-շեշտեց Շարմազանովը: