Սա ամբողջությամբ բացառություն է. Զեյնալյանը՝ ՊՊԾ գունդը գրաված խմբի անդամների վրա համաներումը տարածելու մասին

«Հիշում եք 2009թ. համաներումը Մարտի 1-ի դեպքերի ամբաստանյալների և մեղադրյալների նկատմամբ: Այսինքն` սա նորություն չէ, որ իրականացվել է: Եթե խոսքը տարբերակված մոտեցման մասին է, ապա օրինաչափ վարքագիծը կամ օրինաչափ իրավունքը նախատեսված է քրեական օրենսգրքով, քրեակատարողական իրավական ակտերով: Սա ամբողջությամբ բացառություն է, ամբողջությամբ տարբերակված մոտեցում է: Համաներման ակտը տարբերակված մոտեցումների համախումբ է, սա իրավունք չէ, սա պետության կողմից պարտականություն չէ, որ պետք է ի կատար ածել: Ինչպես արդեն հնչեցրել եմ, սա շնորհ է, արտոնություն է, և արտոնությունը պետությունն իրականացնում է իր հայեցողությունների, իր հնարավորությունների շրջանակներում, հասարակությունից ստացած քաղաքական պատվերի շրջանակներում, հանձնարարության շրջանակներում»,- ասաց Զեյնալյանը:

ՀՀ արդարադատության նախարարի պաշտոնակատարն ընդգծեց, որ այստեղ կա իրավունքների հավասարակշռություն: «Եթե նկատեցիք, մենք բազմաթիվ կետերում այդ հավասարակշռությունը փորձել ենք ապահովել` բոլոր շահառուների, այդ թվում նաև՝ մրցակցող շահերի պայմաններում: Նախատեսել ենք նաև սպանվածների, պատանդառուների և մարմնական վնաս կրած անձանց իրավունքների պաշտպանությունը: Եթե նրանք առարկեն, ապա այս համաներումը չի կիրառվի: Մենք չենք կարող անտեսել նաև նրանց իրավունքները: Այս համաներման ակտը այդպիսի հավասարակշռություններով, այդպիսի տարբերակված մոտեցումների կամայականությունների կամ անարդար ընկալվելու բազմաթիվ երաշխիքներ է պարունակում, ի տարբերություն շատ այլ համաներման ակտերի: Մենք փորձել ենք սա մաքսիմալ հավասարակշռել»,- նշեց Զեյնալյանը՝ ևս մեկ անգամ շեշտելով, որ սա իրավունք չէ, սա արտոնություն է:

Ըստ նրա` համաներման ակտն արդեն օբյեկտիվ իրականություն է, դրա օգտին քվեարկել է Ազգային ժողովի 75 պատգամավոր, և նախագահի կողմից ստորագրվելուց հետո, այն կիրականացվի: