Ռոբերտ Քոչարյան անունով քաղաքական գործոն ՀՀ-ում գոյություն չունի. Նիկոլ Փաշինյան

Հայաստանի Հանրապետության վարչապետ Նիկոլ Փաշինյանն արձագանքել է ՀՀ երկրորդ նախագահ Ռոբերտ Քոչարյանի այն հայտարարությանը, թե «Նիկոլ Փաշինյանը դեռ կփոշմանի, որ իր հետ գլուխ է դրել»:

«Շենգավիթ» բժշկական կենտրոնի նոր մասնաշենքի բացման արարողությունից հետո լրագրողների հետ զրույցում ՀՀ վարչապետն ընդգծեց, որ այդ հայտարարություններով Քոչարյանը ցույց է տալիս իր քաղաքական ընկալումների և ըմբռնումների մակարդակը: «Սա իրենց թաղի կռիվ չէ, որտեղ պարտվողները հեռանալիս ասում են՝ դե դու դեռ կփոշմանես»,- ասաց Փաշինյանը:

Դիտարկմանը, թե Ռոբերտ Քոչարյանը նաև ասել է, թե իշխանությունները իր մեջ սպառնալիք են տեսնում, Նիկոլ Փաշինյանը պատասխանեց. ««Կոմերսանտ» թերթը ինձ հարց էր տվել, որ ասում են, թե դուք դա անում եք քաղաքական գործոնը չեզոքացնելու համար: Ես ասել եմ և հիմա էլ ասում եմ՝ Ռոբերտ Քոչարյան անունով քաղաքական գործոն Հայաստանի Հանրապետությունում գոյություն չունի»: