Սիսի կաթողիկոսարանի վերադարձի հայցը ամենաուշը հոկտեմբերին կներկայացվի թուրքական դատարան

Հուլիսի 31-ին Ս. Աստվածածին վանքում Մեծի Տանն Կիլիկիո Արամ Ա կաթողիկոսի նախագահությամբ տեղի է ունեցել Սիսի կաթողիկոսարանի վերադարձի պահանջի իրավական հանձնախմբի աշխատանքային հանդիպումը:

Ըստ Armenianorthodoxchurch-ի` նշյալ հայցով թղթածրարը գրեթե ստացել է իր վերջնական ձևը և փոքր հստակեցումներից ու հավելումներից հետո ամենաուշը հոկտեմբերին կներկայացվի թուրքական դատարան:

Հիշեցնենք, որ սույն հայցը շուրջ երեք տարի առաջ ներկայացվել էր Թուրքիայի Սահմանադրական դատարան, սակայն այն մերժել էր քննել դատը` ընդառաջելով երկրի արդարադատության նախարարության պահանջին: Նույն հայցը մեկ տարի անց ներկայացվել էր Եվրոպայի Մարդու իրավունքների դատարան, որը նույնպես մերժել էր ընդունել դատը և հորդորել դիմել թուրքական դատարան:

Ըստ իրավական հանձնախմբի` դատի քննությունը մերժող հիշյալ մոտեցումները, ըստ էության, առավելաբար քաղաքական բնույթի են: Բոլոր դեպքերում` Մեծի Տանն Կիլիկիո կաթողիկոսությունը որոշել է շարունակել իրավական այս գործընթացը` մինչև արդարության հաղթանակը և Սիսի կաթողիկոսարանի վերադարձը հայ ժողովրդին: