Հայաստանում տեղի ունեցող իրադարձությունները չեն համընկնում երկրի իշխանությունների հայտարարությունների հետ. Լավրով

Հայաստանում տեղի ունեցող իրադարձությունները չեն համընկնում Հայաստանի իշխանությունների այն հայտարարությունների հետ, որ իրենք հրաժարվելու են հետապնդել իրենց նախորդներին, այս մասին ասել է ՌԴ ԱԳՆ ղեկավար Սերգեյ Լավրովը: Հաղորդում է «ՌԻԱ Նովոստի»-ն:

«Ռուսաստանը որպես Երևանի դաշնակից միշտ հետաքրքրված է եղել հայկական պետության կայունությամբ, ահա ինչու այնտղ կատարվող իրադարձությունները չեն կարող չանհանգստացնել, այդ թվում` ԱՊՀ տարածքում գործող կազմակերպությունների հետ նորմալ գործակցելու տեսանկյունից»,- ասել է Լավրովը:

«Վերջին օրերին մենք մի քանի անգամ մեր անհանգստությունը հայտնել ենք Հայաստանի ղեկավարությանը: Ակնկալում ենք, որ իրադարձությունները, ամեն դեպքում, կընթանան կառուցողական ճանապարհով»,- հավելել է նախարարը:

Հիշեցնենք, որ հուլիսի 26-ին Հայաստանի Հատուկ Քննչական կոմիտեն մեղադրանք է առաջադրել Հայաստանի երկրորդ նախագահ Ռոբերտ Քոչարյանին` նրան ձերբակալելով: Երկրորդ նախագահը մեղադրվում է 2008թ մարտի 1-ի իրադարձությունների ժամանակ սահմանադրական կարգը տապալելու մեջ:  Նույն մեղադրանքն է առաջադրվել նաև ՀԱՊԿ գլխավոր քարտուղար  Յուրի Խաչատուրովին, ով գրավի դիմաց ազատ է արձակվել: