Կարևոր է, որ Հայաստանում տեղի ունեցող իրադարձությունները ճեղքեր չառաջացնեն հայ-ռուսական հարաբերություններում. ՌԴ դեսպան

Գործընկերների ընտրությունը Հայաստանի սուվերեն գործն է, բայց մեզ համար կարևոր է, որ Հայաստանում տեղի ունեցող փոփոխությունները, որոնք առնչվում են մեր սերտ հարաբերություններին, չառաջացնեն վտանգավոր ճեղքեր. ըստ Yerkir.am-ի՝ այս մասին այսօր ՌԴ դեսպանատանը տարեվերջյան ասուլիսի ժամանակ հայտարարեց ՌԴ դեսպան Սերգեյ Կոպիրկինը, հավելելով, որ Ռուսաստանն ուշադիր հետևում է, թե Հայաստանն ինչպես է լուծում երկրի առջև ծառացած խնդիրները:

«Լեռնային Ղարաբաղի հակամարտության կարգավորումը եղել է և կա ՌԴ արտաքին քաղաքականության առաջնահերթություններից, որը գտնվում է մեր երկրի խիստ վերահսկողության տակ: Ռուսաստանը հանդիսանում է միջնորդ, որը ձգտում է լուծել հակամարտությունը քաղաքական մեթոդներով՝ կողմերի համար ընդունելի մոտեցումներով», - նշեց ռուս դեսպանը:

Ըստ դեսպանի՝ երկու երկրներն ունեն բազմաթիվ ընդհանուր շահեր, որն արտացոլվում է երկու կողմում էլ կամքի առկայությամբ՝ հարաբերությունների որակն ու դաշնակցային մակարդակը պահպանելու և բարձրացնելու ուղղությամբ. « Այս տարի Հայաստան այցելեցին Ռուսաստանի Դաշնության նախագահը, պաշտպանության, արտաքին և ներքին գործերի նախարարները, Ռուսաստանի Դաշնության ԱԽ քարտուղարը, Ռուսաստանի Դաշնության Դաշնային ժողովի Պետական դումայի նախագահը, Դաշնային ժողովի Դաշնության խորհրդի փոխնախագահը։ Սա վկայում է այն մասին, որ մենք քննարկելու բան ունենք։ Մեր հարաբերությունները զարգանում են ամենատարբեր ոլորտներում». – հայտարարեց Կոպիրկինը:

«Մենք բարձր ենք գնահատում այն փոխհարաբերությունները, որոնք մեր երկրները իրականացնում են միջազգային կառույցներում», - ասաց դեսպանը՝ հավելելով, որ նմանատիպ կառույցներում ՌԴ-ի համար կարևոր հարցերի քվեարկությունների արդյունքները ցույց են տալիս, որ ՀՀ-ն շարունակում է մնալ ՌԴ կարևորագույն և հուսալի գործընկերը, որի վրա միշտ կարելի է հույս դնել դժվար պահերին: