Ալիևը հույս ունի, որ Հայաստանում տեղի ունեցող իրադարձությունները չեն ազդի նոյեմբերի 10-ի հայտարարության վրա

Ադրբեջանի նախագահ Իլհամ Ալիևը հայտարարել է, որ Երևանում տեղի ունեցողը Հայաստանի ներքին գործն է, և՛ նախկին, և՛ ներկայիս ղեկավարությունը մեղավոր են ստեղծված իրավիճակի համար, այդ իրադարձությունները խարխլում են հայկական պետականությունը:

«Սա երկրի ներքին գործն է»,- ասել է Իլհամ Ալիևը արտասահմանցի լրագրողների համար մամուլի ասուլիսում:

Ալիևը հույս է հայտնել, որ Հայաստանը, չնայած ներքին գործընթացներին, կկատարի իր պարտավորությունները, որոնք նախատեսված են 2020 թվականի նոյեմբերի 10-ի եռակողմ համաձայնագրով:

«Հիմա Հայաստանում ճգնաժամային իրավիճակ է: Չեմ ցանկանա մեկնաբանել նրանց ներքին գործընթացները: Մենք երբեք չենք խառնվում այլ երկրների ներքին գործերին, հատկապես՝ այդպիսի զգայուն պահին: Բայց պատերազմից հետո արդյունքները մնում են անփոփոխ, և 2020 թ. նոյեմբերի 10-ի համաձայնագիրը հարգվում է և պետք է կյանքի կոչվի»,- ասել է Ալիևը: