Համոզված եմ, որ Արամ Մանուկյանի արձանի բացումից հետո այդ տարածքն իրոք կգեղեցկանա. Արթուր Եղիազարյան

ՀՅԴ ԳՄ անդամ Արթուր Եղիազարյանը իր ֆեյսբուքյան էջում գրել է.

«Մշակույթի նախարարությունը, տարօրինակ կերպով անընդունելի համարելով Արամ Մանուկյանի արձանի տեղադրումը մետրոպոլիտենի «Հանրապետության Հրապարակ» կայարանի հարևանությամբ, հունիսի 28-ին հանդես է եկել ինքն իրեն հակասող հայտարարությամբ: Մեջբերումներ հայտարարությունից. 

1. «Հայաստանի Հանրապետության մշակույթի նախարարությունը համարում է, որ Երևանի մետրոպոլիտենի «Հանրապետության հրապարակ» կայարանը Երևանի կերպարը յուրահատուկ դարձնող ամենասիրված կառույցներից մեկն է և կիսում է հասարակության ու մասնագետների մտահոգությունը՝ կայարանի պատմագեղարվեստական կերպարը փոխելու հարցում:
Նախարարությունը գտնում է, որ Երևանի մետրո­պոլիտենի «Հանրապետության հրապարակ» կայարանը կարող է հանդիսանալ խորհրդահայ ճարտարապետության 20-րդ դարի մոդեռնիզմի նվաճում հանդի­սացող կառույցներից մեկը, որի համար սկսվել է նորահայտ հուշարձանի կարգավիճակ տալու գործընթաց:»:
2. «Միաժամանակ, կարևոր համարելով Արամ Մանուկյանի դերն ու գործունեությունը հայոց պատմության մեջ և նրա արձանի կառուցման խնդիրը Երևան քաղաքում՝ այնուհանդերձ անընդունելի ենք համարում առանց մշակույթի նախարարության հետ քննարկման և համաձայնեցման արձանի տեղադրման թույլատրումը»:
3. «Համաձայն «Պատմության և մշակույթի անշարժ հուշարձանների ու պատ­մական միջավայրի պահպանության և օգտագործման մասին» ՀՀ օրենքի՝ հուշարձանների պահպանական գոտիների տարածքներում շինարարական աշխատանքների իրականացումը կատարվում է ՀՀ մշակույթի նախարարության թույլտվությամբ՝ հաշվի առնելով նաև Երևան քաղաքի պատմամշակութային հիմնավորման՝ հուշարձանների պահպանական գոտիների նախագծի դրույթները»:
----------------------------------
Նկատեցի՞ք, որ 1-ին և 3-րդ կետերը հակասում են իրար: Առաջին կետի երկրորդ պարբերությունում ասում է, որ ՍԿՍԵԼ Է «Հանրապետության Հրապարակ» կայարանի շրջակայքին նորահայտ ՀՈՒՇԱՐՁԱՆԻ ԿԱՐԳԱՎԻՃԱԿ ՏԱԼՈՒ ԳՈՐԾԸՆԹԱՑ, իսկ երրորդ կետում ասում է, որ ՀԱՄԱՁԱՅՆ «Պատմության և մշակույթի անշարժ հուշարձանների ու պատ­մական միջավայրի պահպանության և օգտագործման մասին» ՀՀ ՕՐԵՆՔԻ՝ ՀՈՒՇԱՐՁԱՆՆԵՐԻ պահպանական գոտիների տարածքներում շինարարական աշխատանքների իրականացումը կատարվում է ՀՀ մշակույթի նախարարության թույլտվությամբ՝ հաշվի առնելով նաև Երևան քաղաքի պատմամշակութային հիմնավորման՝ հուշարձանների պահպանական գոտիների նախագծի դրույթները:
Այսինքն՝ այն այս պահին հուշարձան չէ, բայց անընդունելի է համարում Արամ Մանուկյանի արձանի տեղադրումը՝ առանց ՀՀ մշակույթի նախարարության թույլտվության:

Գնացեք դեռ տեր կանգնեք այն ամենին, որ օրենքի առկայությանբ՝ ողջ քաղաքը տարիներով զրկեցին պատմամշակութային տեսքից՝ հուշարձանների պահպանական գոտիներում թույլատրելով մասնավոր և «էլիտար» շինարարություններ: Ի դեպ, այքան մտածող եք՝ փրկեք Արամ Մանուկյանի՝ պատմական հուշարձան հանդիսացող տունը Արամի փողոցի վրա, որն ամեն օր կարող է հանկարծակի փլվել:

Առաջին կետում ասում է, որ նախարարությունը համարում է, որ Երևանի մետրոպոլիտենի «Հանրապետության հրապարակ» կայարանը Երևանի կերպարը յուրահատուկ դարձնող ԱՄԵՆԱՍԻՐԱԾ ԿԱՌՈՒՅՑՆԵՐԻՑ մեկն է և կիսում է «հասարակության ու մասնագետների. մտահոգությունը՝ կայարանի պատմագեղարվեստական կերպարը փոխելու հարցում:

Առաջին հերթին կխնդրեի, որ ողջ հասարակության ու մասնագետների անունից չխոսել, քանի որ հասարակության ու մասնագետների մի մասն էլ լրիվ հակառակ կարծիքն ունի այս հարցում: Մենք էլ ենք հասարակություն:

Երկրորդ հերթին՝ գոնե մեկ անգամ այցելեք այդ տարածք ու նոր ասեք, որ Երևանի մետրոպոլիտենի «Հանրապետության հրապարակ» կայարանի շրջակայքը Երևանի կերպարը յուրահատուկ դարձնող ամենասիրված կառույցներից մեկն է:

Այո, մի գուցե այդ տարածքում գիշերող բոմժերի (կատակ չեմ անում) ու բնական կարիքները հոգացողների (կատակ չեմ անում) համար: Շրջեք ու կհամոզվեք:
Կարող եմ ձեր ալարկոտությունը փոխհատուցել. քիչ առաջ մի քանի նկարներ եմ արել այդ տարածքի շուրջբոլորից: Ինչպես ասում են՝ փաստերն ակնհայտ են, թե ինչքան եք սիրում ու խնամքով վերաբերել այդ կայարանի շրջակայքին: «Զմայլվեք» ստորև ներկայացված նկարներով:
Հ.Գ. Նկարներում՝ Արամ Մանուկյանի տեղադրված արձանը և հուշարձանին հարող շրջակա տարածքը:
Հ.Գ. Համոզված եմ, որ Արամ Մանուկյանի արձանի բացումից հետո այդ տարածքն իրոք կգեղեցկանա ու կդառնա հայության սիրված վայրերից մեկը, իսկ Արամով՝ նաև իմաստավորված: