Նորատուսցի Ալիկին չէին տեղափոխել դատարան

2016 թվականի նոյեմբերի 13-ին Չարբախում երկու անձի սպանության գործով ամբաստանյալ Ալիկ Բանդուրյանին այսօր չէին բերել դատարան: Երևանի ընդհանուր իրավասության դատարանի դատավոր Նելլի Բաղդասարյանը տեղեկացրեց, որ Ալիկ Բանդուրյանին հնարավոր չի եղել ներկայացնել դատարան, նախնական տվյալներով, վատառողջ լինելու պատճառով: Դատավորն ասաց, որ նշվածի վերաբերյալ որեւէ գրություն դատարանը դեռ չի ստացել:

Այսօրվա նիստին չէր ներկայացել նաև Բանդուրյանի պաշտպան Երեմ Սարգսյանը: Նա դիմում էր գրել դատարանին՝ նշելով, որ վատառողջ լինելու պատճառով չի կարող ներկա լինել այսօրվա նիստին: Այս հիմքով էլ դատարանը երկու շաբաթով հետաձգեց այսօրվա դատական նիստը:

Հիշեցնենք, որ այս գործով ամբաստանյալ Ալիկ Բանդուրյանը մեղադրվում է 2016թ. նոյեմբերի 13-ին Պետրոս Իսրայելյանին այլ անձանց հետ համատեղ Մուշեղ Մուշեղյանի առողջությանը դիտավորությամբ ծանր վնաս պատճառել դրդելու մեջ: Այսինքն` հորդորելու, շահագրգռելու եղանակով Պետրոս Իսրայելյանի մոտ Մուշեղ Մուշեղյանի նկատմամբ հանցավոր ոտնձգություն կատարելու վճռականություն է հարուցել, ինչպես նաև նույն օրը հանցավոր խմբին օժանդակել է պլանավորված հանցագործության անխոչընդոտ իրականացմանը` Մուշեղ Մուշեղյանի առողջությանը ծանր վնաս պատճառելու գործընթացը հեշտացնելու, հետևաբար` խոչընդոտները վերացնելու եղանակով: