Ո՞նց կարելի ա ասել, որ դա նորմալ ա. Նահապետ Գևորգյան

ՀՀԿ-ական պատգամավոր Նահապետ Գևորգյանը մտահոգված չէ ԱԱԾ նորանշանակ տնօրենի հայտարարություններից: Խորհրդարանում լրագրողների հետ զրույցում նա նշեց, որ մտահոգություններ չունի:

Հիշեցնենք, որ ԱԱԾ նորանշանակ տնօրեն Արթուր Վանեցյանը ԶԼՄ ղեկավարների հետ հանդիպման ժամանակ հայտարարել էր, որ շուտով կբացահայտվեն ապօրինի խոշոր հարստացած մարդիկ: 

Հարցին` նրա համար արտառոց չէ՞, որ երկրում եղել է 350 անձ, որոնց անուններով խոշոր բիզնեսներ են բացվել, ինչի մասին հայտարարել է ԱԱԾ տնօրենը, պատգամավորն արձագանքեց. «Ես ինչի՞ պիտի տեղյակ լինեմ: Ես չեմ կարա էդ հարցերին պատասխանեմ»: 

Միևնույն ժամանակ նա նշեց, որ դա նորմալ չէ: «Ո՞նց կարա դա նորմալ լինի, ո՞նց կարելի ա ասել` դա նորմալ ա»,- նշեց Գևորգյանը:

Հարցին` դա նաև Ձեր թերությունը չէ՞, նա պատասխանեց. «Ոչ, ես չեմ գտնում, որ թերացել եմ»:

Ճշտող հարցին, որ խոսքն իր մասին չէ, այլ իր քաղաքական ուժի, պատգամավորը պատասխանեց. «Գնացեք ու հարցրեք նրան, ում նկատի ունեք: Ձեր հարցերին էլ չեմ պատասխանում»: