Հույս ունեմ՝ տնտեսական բավարար աճ ապահովելով` կքննարկենք բարձրագույն կրթությունն անվճար դարձնելու հարցը. նախարար

Մատչելի և անվճար կրթությունը կրթական համակարգի խնդիր է, որը պետք է քննարկենք: Այս մասին «Ազատություն» ռադիոկայանի ֆեյսբուքյան ասուլիսի ժամանակ ասաց ՀՀ ԿԳ նախարար Արայիկ Հարությունյանը:

Նա հույս հայտնեց, որ, առաջիկա տարիներին տնտեսական բավարար աճ ապահովելով, կքննարկեն բարձրագույն կրթությունն անվճար դարձնելու հարցը: «Հիմա չեմ ուզում ասել՝ սա օրակարգային հարց է՝ հաշվի առնելով ներկայիս տնտեսական վիճակը, բայց այն ցանկալի իրավիճակ կլինի»,- ասաց նախարարը:

Պատասխանելով հարցին, թե արդյո՞ք, բուհի ռեկտորներին հանելով, բուհերի խնդիրները կլուծվեն, Հարությունյանը պատասխանեց, որ իրականում բուհերի խնդիրը համակարգային է: «Մենք այս խնդրին  բախվել ենք տարիներ շարունակ, քանի որ ռեկտորներին նշանակում էին խորհուրդները, որոնց իշխանությունն էր նշանակում, և ռեկտորներն էլ որոշակի պարտավորվածություն ունեին իշխանության հանդեպ: Այստեղից էլ առաջանում էին կառավարելիության խնդիրներ՝ վատ էր կառավարվում բուհը, որոշ միջոցներ գնում էին իշխանամետ հիմնադրամներին, օրինակ` Երիտասարդական հիմնադրամին»,- նշեց նախարարը: