Կքննարկենք, որպեսզի նշվեն շարժական արագաչափերի կիրառման հիմնական ուղղությունները. նախարար

ՀՀ արդարադատության նախարար Դավիթ Հարությունյանի կարծիքով՝ շարժական արագաչափերի կիրառումը չի խախտում անձանց անձնական տվյալների պաշտպանության իրավունքը, եթե, իհարկե, որոշակի կանոններ պահպանվում են: Լրագրողների հարցերին ի պատասխան, նախարարը նշեց, որ շարժական արագաչափերը կիրառվում են բազմաթիվ երկրներում: «Կարելի է կիրառել շարժական ու ոչ շարժական արագաչափ և երկու դեպքում էլ խախտել օրենքը»,- ասաց նա:

«Մարդիկ խանութների կողքով երբ քայլում են, արդյո՞ք այնտեղ առկա տեսանկարահանող սարքերը չեն խախտում նրանց իրավունքները»,- նաև հարցրեց նախարարը:

Ի պատասխան՝ լրագրողները նշեցին, որ խանութներում և այլ վայրերում մարդիկ իրազեկված են, որ տարածքը հսկվում է տեսախցիկներով:

Նախարարի կարծիքով՝ խաչմերուկներում ևս առկա են տեսախցիկներ, որոնք նկարահանում են իրականացնում, և դա խախտում չէ: Լրագրողներն էլ նշեցին, որ, ի դարբերություն շարժական տեսանկարահանող-արագաչափ սարքերի, խաչմերուկների տեսախցիկները տեսանելի են հանրությանը, ավելին` էլեկտրոնային կայքերում առկա են, և հանրությանը հասանելի են տեսանկարահանող սարքերի տեղակայման վայրերի վերաբերյալ տվյալները:

«Իսկ եթե տեղեկացնեն, որ այսօր շարժական արագաչափը կկիրառվի, ենթադրենք, Երևանից- Սևան, Երևան-Գորիս և Երևան- Արարատ ճանապարհներին, բավարարված կլինե՞ք»,- հարցրեց նախարարն ու հավելեց. «Կքննարկենք, որպեսզի հիմնական ուղղությունները նշվեն»: