Այդ «դ» տառն Ալիկ Սարգսյանն իր վրա վերցրեց, նա դավաճանեց իր ընտրողին. բնակիչները՝ Ալիկ Սարգսյանին

Հայտնել էինք, որ Արարատի մարզի Դեղձուտ և շրջակա համայնքների բնակիչները շրջապատել էին ՀՀԿ-ական պատգամավոր Ալիկ Սարգսյանի տունը` պահանջելով բացատրել՝ ինչո՞ւ չի քվեարկել ժողովրդի թեկնածուի օգտին:

Ավելի վաղ Ալիկ Սարգսյանը լրագրողների հետ զրույցում հայտարարել էր.  «Ես 2012թ.-ից էնքան եմ առնչվել «դ» տառով էդ չարիքի հետ, որ կոչվում ա դավաճանություն… Աշխարհի վերջը գա, ես թիմ չեմ դավաճանի, իմ ընկերներին չեմ դավաճանի, էդ «դ» տառը իմ վրա չեմ վերցնի: Կդնեմ մանդատս, կգնամ տուն, բայց թիմիս չեմ դավաճանի»:

Բնակիչները նրան ժամանակ էին տվել մինչև ժամը 16:00-ն` մանդատը վայր դնելու համար, սակայն Սարգսյանը չի արձագանքել նրանց պահանջին:

Yerkir.am-ի հետ զրույցում բնակիչներն ասացին, որ իրենք են ընտրել Ալիկ Սարգսյանին, և նրա կուսակցությունը պետք է լինի իրեն ընտրած ժողովուրդը: «Այդ «դ» տառն Ալիկ Սարգսյանն իր վրա վերցրեց, նա դավաճանեց իր ընտրողին»,- ասացին նրանք մեզ հետ զրույցում:

Այս պահին բնակիչները երթով շարժվում են հրապարակ, սակայն խոստացան` եթե Ալիկ Սարգսյանը չմիանա շարժմանը կամ վայր չդնի մանդատը, ամեն օր շրջափակելու են նրա առանձնատունը: