Համաճարակների հետևանքով կյանքը կորցրած օսմանյան քաղաքացիներ. Էրդողանի ուղերձը Ցեղասպանության տարելիցի առթիվ

Թուրքիայի նախագահ Ռեջեփ Թայիփ Էրդողանը Հայոց ցեղասպանության 103-րդ տարելիցի կապակցությամբ այս տարի դարձյալ ուղերձ է հղել, որը ընթերցվել է Քումքափըի եկեղեցում պատարագի ժամանակ:

Էրդողանն իր ուղերձն սկսել է` խոսքն ուղղելով Պոլսում պատրիարքի վերանշանակված փոխանորդ Արամ Աթեշյանին, և, ըստ սովորության, զոհերի մասին խոսելիս միայն նկատի ունեցել օսմանյան հայերին:

Ուղերձը ներկայացնում ենք ստորև.

«Հարգելի Արամ Աթեշյան՝ Թուրքիայում հայերի պատրիարքի փոխանորդ,

իմ թանկագին հայ քաղաքացիներ

Ամենասրտանց զգանցմունքներով ողջունում եմ ձեզ:

Այսօր դուք հավաքվել եք Ստամբուլի հայոց պատրիարքարանի տանիքի տակ`ոգեկոչելու Առաջին համաշխարհային պատերազմի դժվար և տառապալի պայմաններում զոհված օսմանյան հայերի հիշատակը:

Հարգանքով հիշում եմ իրենց կյանքը կորցրած օսմանյան հայերին և սրտանց ցավակցություններս եմ հղում նրանց երեխաներին և թոռներին:

Այս առիթով նաև ողորմություն և ներում եմ խնդրում Աստծուց՝ Ամենակարողից, նույն ժամանակահատվածում համաճարակների, արտագաղթների, պատերազմների և հակամարտությունների հետևանքով իրենց կյանքը կորցրած օսմանյան քաղաքացիների համար:

Պատմության ընթացքում մենք եղել ենք մի ազգ, որն իր ցավերի միջև տարբերակում կամ մրցակցություն չի դնում, այլ կիսում է դրանք:

Բացի մեր սեփական երկրում ապրող մեր ժողովուրդներից, մենք ձգտեցինք օգնել Անդալուզիայի, Աֆրիկայի, Հարավային Ասիայի, Եվրոպայի և նեղ կացության մեջ ընկած բոլորին: Այս ամենն անելիս մենք երբեք չնայեցինք հավատքին, լեզվին, էթնիկական ծագմանն ու մշակույթին:

Այսօր մենք փորձում ենք ամրապնդել եղբայրությունը, ներողամտությունը, խաղաղությունն ու հանգստությունը՝ պահպանելով մեր ժառանգությունը` որպես երկիր:

Պատմության մեջ մեր հայ քաղաքացիների ապրած վշտերը կիսելը թուրք ժողովրդի բարեխիղճ և բարոյական դիրքորոշման անհրաժեշտությունն է: Աստծո կամքով՝ առաջիկա ժամանակահատվածում մենք շարունակելու ենք կիսել ձեր վշտերն ու գտնել ընդհանուր լուծում ձեր մտահոգություններին և խնդիրներին: Ինչ էլ լինի՝ թույլ չենք տա, որ մեր մեկ քաղաքացու նկատմամբ այլ վարվելակերպ լինի, նույնիսկ եթե նա այլազգի է` անկախ նրա հավատալիքներից, կրոնից եւ սովորություններից:

Հավատում եմ, որ մեր հայ քաղաքացիները կշարունակեն ավելացնել իրենց ավանդը մշակութային, մարդկային, քաղաքական և առևտրական կյանքում:

Ես խնդրում եմ ձեզ` հնարավորություն չտալ նրանց, ովքեր մինչ օրս խեղաթյուրում են մեր ընդհանուր անցյալը և խրախուսում պատմության մեջ ոխ պահելը, ատելությունն ու թշնամանքը:

Այս մտորումներով՝ կրկին հարգանքով եմ հիշում Առաջին համաշխարհային պատերազմի ընթացքում իրենց կյանքը կորցրած մեր հայ քաղաքացիներին:

Շնորհակալություն և իմ հարգանքն եմ հայտնում հիշյալ արարողությանը մասնակցած իմ բոլոր քաղաքացիներին»: