Էջևիթի մեծ հայրը քուրդ է եղել. Թուրքիայի նախկին վարչապետի մասին նոր տեղեկություններ են հրապարակվել

Թուրքիայի նախկին վարչապետ Բյուլենթ Էջևիթի մահից դեռևս երեք տարի առաջ լրագրող Մեհմեդ Չեթինգյուլեչը ուշագրավ զրույց էր ունեցել նրա հետ, որը հետագայում վերածել էր գրքի՝ «Հրաժեշտի զրույցներ» վերնագրով:

Ըստ Demokrathaber-ի՝ հայտնի է դարձել, որ Էջևիթի մեծ հայրը՝ Մուսթաֆա Շուքուրը, ունեցել է քրդական ծագում: Դեռևս կենդանության օրոք լրագրողի հետ զրույցի ընթացքում Էջևիթը պատմել է, որ մեծ հոր քրդական արմատների մասին իմացել է նրա մահից տարիներ անց նրա գերեզմանին այցելելիս:

«Քասթամոնուի Դադայ շրջանը քրդաբնակ է եղել: Մորս կողմի արմատները ձգվում են մինչև օսմանական պալատ: Մեծ մորս ամուսինը եղել է Սաուդյան Արաբիայում սուրբ հողերը պահպանող պատասխանատու: Հիմա մենք ովքե՞ր ենք՝ քո՞ւրդ, թե՞ թուրք: Երկու ազգերն այնքան են միաձուլվել, որ անհնար է նրանց միջև խտրականություն դնել: Նման խտրականությունը ոչ մեկին և ոչ մի երկրի օգուտ չի բերի»,- զրույցների մեկը ենթացքում ասել է նա:

Նշենք, որ Բյուլենթ Էջևիթը մահացել է 2006 թվականին 81 տարեկան հասակում: