Վերացնել ընդերքօգտագործման տեղամասերի կոորդինատների անճշտությունները. հանձնարարական

Այսօր կառավարության նիստում վարչապետ Կարեն Կարապետյանը հանձնարարական տվեց ընդերքօգտագործման իրավունքով տրամադրված տեղամասերի ճշգրտման մեխանիզմների վերաբերյալ:

Վարչապետի խոսքով` իրականացված ուսումնասիրությունների արդյունքում արձանագրվել են ընդերքօգտագործման իրավունքով տրամադրված տեղամասերի, հողամասերի, կոորդինատների անճշտություններ և անհամապատասխանություններ: Ստեղծված իրավիճակը խնդիրներ է առաջացնում ոլորտային կազմակերպությունների բնականոն գործունեության, այդ թվում` սեփականության իրավունքի իրացման, պետական վերահսկողական համապատասխան գործառույթների տեսանկյունից:

Հաշվի առնելով դա` վարչապետը հանձնարարեց էներգետիկ ենթակառուցվածքների և բնական պաշարների նախարարին ու աշխատակազմի ղեկավարին` 7-օրյա ժամկետում մշակել և ներկայացնել ընդերքօգտագործման իրավունքով տրամադրված տեղամասերի ճշգրտման աշխատանքների իրականացման միջգերատեսչական աշխատանքային խումբ ստեղծելու վերաբերյալ որոշման նախագիծ:

 Համապատասխան մարմիններին հանձնարարվեց երկամսյա ժամկետում վեր հանել ընդերքօգտագործող կազմակերպությունների, հատկապես` մետաղական հանածոների ոլորտում տրամադրված փաստաթղթերում առկա տեղամասերի և հողամասերի համապատասխան կոորդինատների անճշտությունները, ձեռնարկել միջոցներ դրանք վերացնելու ուղղությամբ: