Թուրքիայի ԱԳՆ-ն երկընտրանք է տեսնում Նիդերլանդների՝ Հայոց ցեղասպանության վերաբերյալ նախագծերի ընդունման դեպքում

Թուրքական կողմը կրկին անդրադարձել է Նիդերլանդների խորհրդարանում քննարկվելիք՝ Հայոց ցեղասպանության մասին երկու նախագծերին:

Ըստ «Ակօս»-ի՝ երկրի ԱԳՆ խոսնակ Համի Աքսոյը նշել է, որ այդ հարցով իրենց կայացնելիք որոշմամբ Նիդերլանդների իշխանություններն ի ցույց կդնեն Թուրքիայի հետ հարաբերությունների կարգավորման ցանկության առկայությունը կամ դրա բացակայությունը:

«Նրանք, այսպիսով, ցույց կտան՝ ունե՞ն մեր երկրի հետ հարաբերությունները լավացնելու ցանկություն, թե՞ ոչ»,- ասել է Աքսոյը:

Հիշեցնենք, որ Նիդերլանդների խորհրդարան է ներկայացվել Հայոց ցեղասպանության վերաբերյալ երկու նոր նախագիծ: Դրանցից առաջինը վերահաստատում է Նիդերլանդների՝ դեռևս 2004 թվականին Ցեղասպանության ճանաչման որոշումը, իսկ երկրորդի ընդունման դեպքում նախատեսվում է Նիդերլանդներից կառավարության ներկայացուցչի մակարդակով այցելություն Հայոց ցեղասպանության զոհերի հուշահամալիր: