11-ամյա աղջկա կյանք խլած պատահարի մասնակից «Համեր»-ի վարորդն ազատ է արձակվել

Հայտնել ենք, որ ՀՀ նախագահ Սերժ Սարգսյանի հրամանագրով, դեռևս դեկտեմբերի 18-ից դադարեցվել են ՀՀ վերաքննիչ քրեական դատարանի դատավոր Կարինե Ղազարյանի լիազորությունները, քանի որ լրացել էր նրա պաշտոնավարման ժամկետը:

Yerkir.am-ի տեղեկություններով՝ թոշակի անցնելուց մեկ ամիս առաջ Ղազարյանն անսպասելի որոշում է կայացրել՝ ազատ արձակելով աղմկոտ վթարի գործով կալանավորված՝ Գառնիի «Սուրիկի լավաշ» ՍՊԸ-ի հիմնադիր Սուրիկ Հակոբյանի թոռան՝ 23-ամյա Արթուր Արտուշի Հակոբյանին:

Խոսքը վերաբերում է այս տարվա սեպտեմբերի 5-ին Երևանի Աճառյան փողոցում 11-ամյա աղջնակի կյանք խլած վթարի գործին: Մեր տեղեկություններով՝ Հակոբյանն ազատ է արձակվել գրավի դիմաց:

Հիշեցնենք որ օրեր առաջ ՀՀ հատուկ քննչական ծառայությունը հայտարարեց այս գործով նախաքննության ավարտի մասին: Տեղեկացանք նաև, որ նախքան կալանքից ազատվելը Հակոբյանը հրաժարվել է իր պաշտպան Հովիկ Արսենյանի ծառայություններից:

Արսենյանը դեռևս ամիսներ առաջ Yerkir.am-ին հայտնել էր, որ իր պաշտպանյալին առաջադրված մեղադրանքն ու կալանքի որոշումն ապօրինի է: Նրա խոսքով՝ Հակոբյանը կարճ տարածությունում չէր կարող հասցնել ավտոմեքենան արգելակել, կանգ առնել, դրա համար էլ ստիպված է եղել շրջանցել, ինչը, դժբախտաբար, նրա մոտ չի ստացվել:

Նշենք որ Արթուր Հակոբյանը մեղադրվում է ՀՀ ՔՕ 242-րդ հոդվածի 2-րդ մասի հատկանիշներով (Ճանապարհային երթևեկության և տրանսպորտային միջոցների շահագործման կանոնները խախտելը, որն անզգուշությամբ առաջացրել է մարդու մահ) նախատեսված հանցագործության կատարման մեջ:

Վթարի հիմնական մեղավորը՝ ԱԻՆ աշխատակից Լևոն Հակոբյանը, դեռևս կալանքի տակ է: Նրան մեղադրանք է առաջադրվել ՀՀ քրեական օրենսգրքի 242-րդ հոդվածի 2-րդ մասի հատկանիշներով (Ճանապարհային երթևեկության և տրանսպորտային միջոցների շահագործման կանոնները խախտելը, որն անզգուշությամբ առաջացրել է մարդու մահ) եւ ՀՀ ՔՕ 244 հոդվածով (Ճանապարհատրանսպորտային պատահարի վայրը թողնելը):

Հիշեցնենք, որ վթարի հետևանքով տեղում մահացել էր 11-ամյա Լ. Մ-ն, իսկ մյուս ուղևորներ՝ 34-ամյա Ք. Սարգսյանը, 31-ամյա Ա. Մուրադյանը և Opel-ի վարորդ Կ. Մկրտչյանը մարմնական վնասվածքներով տեղափոխվել էին «Սուրբ Գրիգոր Լուսավորիչ» բժշկական կենտրոն: