Հնարավոր է տարին փակենք մոտ 7 % տնտեսական աճով. փոխնախարար

Տարեվերջին Հայաստանի տնտեսության ակտիվության ցուցանիշը կմնա 7.3 տոկոս: Այս մասին այսօր լրագրողների հետ ճեպազրույցում ասաց տնտեսական զարգացման եւ ներդրումների փոխնախարար Տիգրան Խաչատրյանը:

«Տնտեսական աճը միշտ մոտ է տնտեսական ակտիվությանը: Տնտեսական ակտիվության և աճի թվերը տարբերվում են այն դեպքում, երբ տնտեսության մեջ տեղի  են ունեցել կառուցվածքային փոփոխություններ»,- պարզաբանեց փոխնախարարը:

Նա տեղեկացրեց, որ տնտեսական ակտիվության ցուցանիշով արդյունաբերության ոլորտում աճը կազմում է ավելի քան 12%, իսկ ծառայությունների և առևտրի ոլորտում՝ 14 %:

Փոխնախարարի խոսքով՝ բարձր տոկոս է կազմել հատկապես ապրանքների արտահանման ակտիվությունը՝ արձանագրելով ավելի քան 23% աճ:

«Շինարարության ոլորտում, ի վերջո, նախորդ ամիսներին արձանագրված բացասական թվերից հետո արձանագրվեց թեկուզ և փոքր աճ»,- հայտնեց Խաչատրյանը:

Ի դեպ, տնտեսական աճ է նկատվել նաև զբոսաշրջության ոլորտում:

Տիգրան Խաչատրյանը նշեց, որ գյուղատնտեսությունը միակ ոլորտն է, որտեղ այս տարի չարձանագրվեցին նախորդ տարվա դրական ցուցանիշները: Ըստ նրա՝ ցուցանիշի վրա ազդել են տարբեր գործոններ, այդ թվում՝ եղանակային: Փոխնարարը շեշտեց, որ Հայաստանում տնտեսական ակտիվությունը սեզոնային բնույթ ունի, հատկապես` գյուղատնտեսության ոլորտում: