Տոնական ու նախատոնական օրերին մաքսային ծառայությունն ու առևտրային բանկերը կաշխատեն առանց ընդմիջման

Այսօր կառավարության նիստում վարչապետ Կարեն Կարապետյանը հանձնարարական տվեց տոնական և նախատոնական օրերին մաքսային ծառայության և առևտրային բանկերի աշխատանքային գրաֆիկ սահմանելու վերաբերյալ: Վարչապետի խոսքով` իրականացված ուսումնասիրությունները փաստում են, որ տոնական և նախատոնական օրերին կտրուկ ավելանում է արտաքին տնտեսական գործունեություն իրականացնող տնտեսվարողների գործունեությունը, ընդլայնվում են արտահանման և ներմուծման ծավալները, իսկ ֆիզիկական անձինք ավելի հաճախ են հատում մաքսային սահմանը:

Այդ իսկ պատճառով անհրաժեշտ է ապահովել տոնական և նախատոնական օրերին արտահանմամբ և ներմուծմամբ զբաղվող գործարարներին ու քաղաքացիներին մաքսային մարմնի, ինչպես նաև առևտրային բանկերի կողմից համապատասխան ծառայությունների մատուցումը: Այդ թվում` ապահովել մաքսային սահմանը հատելու դեպքում ժամանակին, առանց ուշացման ձևակերպումների տրամադրումը:

Ելնելով վերոնշյալից`  ՊԵԿ նախագահին և ԿԲ նախագահին հանձնարարվեց, դեկտեմբերի 2-ից սկսած, մինչև հունվար ամսվա տոնական օրերի ավարտը տնտեսվարողներին մատուցվող մաքսային ծառայությունների անընդհատությունն ու անխափանությունը, ինչպես նաև առևտրային բանկերի ծառայության անընդհատությունը ապահովելու նպատակով շաբաթ, կիրակի և տոնական օրերին սահմանել աշխատանքների կազմակերպման հերթապահություն` աշխատանքային գրաֆիկին համապատասխան:

Վարչապետը հարցրեց ԿԲ փոխնախագահ Ներսես Երիցյանին. «Ընդունելի՞ առաջարկ է»:

Երիցյանը պատասխանեց, որ կքննարկեն, քանի որ ոչ բոլոր բանկերը կհամաձայնեն այդ ռեժիմով աշխատել, ուստի պետք է ըստ անհրաժեշտության կիրառվի այդ հերթապահությունը: