«Զվեզդա»-ի գնահատականները չեն բխում հայ-ռուսական դաշնակցային հարաբերություններից. Շարմազանով

Այսօր ՀՀԿ ԳՄ նիստից հետո ՀՀԿ խոսնակ Էդուարդ Շարմազանովը պատասխանեց լրագրողների հարցերին: Անդրադառնալով ռուսական «Զվեզդա» հեռուստաալիքի եթեր հեռարձակած հաղորդմանը, որտեղ քննադատվում էր Նժդեհը և ՀՀԿ զինանշանը, Շարմազանովը նշեց, որ Յութուբից հեռացված է արդեն այդ հաղորդումը:

«Զվեզդա»-ի ղեկավարությունը պաշտոնական նամակով դիմել է հայկական կողմին, որում ընդունել է, որ եղել է ոչ կոռեկտ գնահատական: Իսկ ինչ վերաբերում է մեր գնահատականին, ապա այդ հաղորդման ժամանակ հնչած ոչ կոռեկտ գնահատականները չեն բխում հայ-ռուսական դաշնակցային հարաբերություններից»,- ասաց Շարմազանովը` հավելելով, որ Նժդեհը հայ ժողովրդի համար ունի այն նշանակությունը, ինչ` Սուվորովը` ռուս ժողովրդի համար: