Այս պահին ՌԴ հետ համագործակցությունը և դաշնակցային հարաբերությունները շահեկան են Հայաստանի համար. Շարմազանով

Այսօր ՀՀԿ ԳՄ նիստից հետո ՀՀԿ խոսնակ Էդուարդ Շարմազանովը անդրադարձավ Հայաստանի կողմից ՌԴ-ից ստացող 100 միլիոն դոլար ռուսական վարկին: Շարմազանովի խոսքով, Հայաստանը արդեն վերցրել էր 200 միլիոն դոլար ռազմական վարկ, և մինչև տարեվերջ այդ վարկով նախատեսված զենքի վերջին խմբաքանակը կհասնի Հայաստան, և ևս 100 միլիոն դոլարի արտոնյալ վարկ ենք վերցնում ՌԴ-ից:Այդ վարկը, ըստ Շարմազանովի, խոսում է այն մասին, որ Հայաստանի թիվ մեկ խնդիրը իր անվտանգությունը ապահովելն է, և որ Հայաստանը պետք է քայլեր ձեռնարկի ՌԴ հետ ռազմական և ռազմավարական հարաբերությունների զարգացման համար, որտեղ ռազմական համագործակցությունը առանցքային է:

«Այս պահին ՌԴ հետ համագործակցությունը և դաշնակցային հարաբերությունները շահեկան են Հայաստանի համար:Այս պահին չկա որևէ այլ երկիր, որը կարող է Հայաստանին նման արտոնյալ պայմաններում տրամադրել որակյալ զենք-զինամթերք»,- ասաց նա: