Ուսանողները փակել են Բաղրամյան պողոտան. Օսիպյանը փողոցն ազատելու ժամանակ տվեց

Պարտադիր զինվորական ծառայությունից տարկետման իրավունքի սահմանափակման դեմ բողոքող ուսանողները փակել են Բաղրամյան պողոտայի՝ ԱԺ գլխավոր մուտքին հարող հատվածը:

Քիչ առաջ Երևանի ոստիկանապետի տեղակալ Վալերի Օսիպյանը դասադուլավոր ուսանողներին հորդորեց բացել պողոտան` նշելով, որ հակառակ դեպքում ոստիկանությունը կդիմի համապատասխան գործողությունների:

«Մենք մտնում ենք ձեր դրության մեջ, մենք հասկանում ենք ձեր խնդիրը, բայց դուք չարաշահում եք: Ձեր արարքը տանում է բախման ոստիկանության հետ: Մենք տևական ժամանակ հանդուրժողականություն ենք ցուցաբերել, դուք 7 օր շարունակ կոպիտ կերպով խախտել եք «Հավաքների ազատության մասին օրենքը» այն դեպքում, որ դուք կարող էիք դիմել լիազոր մարմնին և երթեր ու հավաքներ անելու համապատասխան թույլտվություն ստանալ»,- ասաց Օսիպյանը և ուսանողներին փողոցն ազատելու համար 5 րոպե ժամանակ տվեց:

«Մենք քաղաքացիների կողմից բողոքներ ունենք, քանի որ դուք սահմանափակում եք նրանց ազատ տեղաշարժը: Մենք, տեսնելով ձեր տարիքը, չենք փորձել գնալ օրենքով նախատեսված այլ գործողությունների»,- ասաց նա: