Ոստիկաններն են փակել Բաղրամյան պողոտան, ոչ թե մենք. ցուցարարներ

Բաղրամյան պողոտան շարունակում է փակված մնալ: Այնտեղ են մի խումբ երիտասարդներ, ովքեր հայտարարեցին, որ ոչ թե ցուցարարներն են փակել Բաղրամյան պողոտան, այլ հենց ոստիկանները:

Նշենք, որ մի ժամ առաջ Երևանի փոխոստիկանապետ Վալերի Օսիպյանը ցուցարարներին հորդորում էր ինքնակամ ապամոնտաժել բարիկադները, հեռացնել աղբամանները և ազատել Բաղրամյան պողոտան:

Հիմա մի խումբ երիտասարդներ հայտարարում են, որ եթե ոստիկանները ցանկանային ազատել պողոտան, դա վաղուց կանեին, բայց նրանք ոչինչ չեն ձեռնարկում այդ ուղղությամբ, հետևաբար` հենց ոստիկաններին է ձեռնտու պողոտան փակ պահել:

Լրագրողներից մեկը հարցրեց` եթե ոստիկանները հիմա աղբարկղները տանեն, ցուցարարները թույլ կտա՞ն: Երիտասարդներից մեկը պատասխանեց. «Ես չեմ թողող-չթողողը, բարիկադը ժողովրդի կողմից է կառուցվել»: Երիտասարդները պնդեցին, որ աղբարկղներն իրենց ինքնապաշտպանության համար են, և իրենք չեն պատրաստվում դրանք ապամոնտաժել: